As verduras e as hortalizas conteñen as vitaminas e os minerais necesarios para o bo funcionamento do organismo. Ademais, achegan outros beneficios moi importantes, grazas ao seu alto contido en fibra e á súa pouca cantidade de graxa. Son moitos os compoñentes que podemos atopar en cada peza, e estes varían en función da cor ou da familia á que pertenza o vexetal. Contámolo no seguinte artigo.
Os minerais das hortalizas
Existe gran cantidade de minerais que o consumo habitual de verduras e hortalizas pode achegar á nosa dieta, como o ferro, o zinc, o fósforo, o potasio, o calcio, o magnesio ou o cobre.
O ferro, por exemplo, resulta moi beneficioso para o sangue e o cerebro, xa que axuda á formación de hemoglobina. Ademais, é un potente nutriente para os músculos, mantenos fortes e sans e contribúe ao correcto transporte do osíxeno cando están a traballar.
O zinc elimina os radicais libres do organismo e mellora a elasticidade da pel.
Pola súa banda, o fósforo é o segundo mineral con máis presenza no corpo humano, por detrás do calcio. A súa función principal consiste en facer desaparecer refugallos do organismo e reparar células e tecidos. Ademais, facilita as dixestións, protexe a saúde de dentes e ósos, incrementa os niveis de enerxía no corpo e mellora a memoria.
O potasio está entre os grandes aliados do sistema nervioso. Impulsa o crecemento do organismo, conserva sans os músculos e ósos e colabora no equilibrio osmótico, é dicir, na adecuada concentración de sustancias dentro e fóra das células. Ademais, produce proteínas a través das súas aminoácidos e intervén no metabolismo dos hidratos de carbono.
O calcio é o mineral con máis abundancia no noso corpo. O seu consumo é moi importante durante a infancia e a adolescencia, debido ás súas propiedades para o perfecto desenvolvemento do esqueleto. Este mineral encárgase de manter os ósos e dentes sans e participa, do mesmo xeito que o zinc, na coagulación do sangue. Ademais, contribúe á transmisión do impulso nervioso, á contracción muscular, á secreción hormonal ou á absorción da vitamina B12. En xeral, trátase dun mineral moi completo, fundamental nunha dieta sa.
O magnesio tamén ten un papel moi importante no mantemento dos dentes, os ósos ou o corazón. Activa as encimas que se encargan de liberar glicosa, promove a formación de proteínas, forma parte da estrutura ósea e impulsa o bo funcionamento do sistema nervioso.
Por último, o cobre é un micromineral fundamental, xa que a súa función resulta clave na asimilación do ferro. Do mesmo xeito que outros minerais, intervén na formación dalgunhas encimas, glóbulos vermellos e hemoglobina. Impulsa a asimilación de vitamina C por parte do corpo e tamén ten un labor significativo no sistema nervioso central.
E as vitaminas?
As froitas e as verduras son baixas en calorías e conteñen gran cantidade de auga, de minerais e, por suposto, de vitaminas. Entre as máis destacadas atopamos as vitaminas hidrosolubles, como a vitamina C, o ácido fólico ou as vitaminas do complexo B, e as vitaminas liposolubles, como os betacarotenos ou as vitaminas A, E e K.
A vitamina C é famosa polas súas propiedades antioxidantes, xa que protexe o ADN das células e evita o envellecemento da pel. Ademais, ten un papel fundamental na absorción do ferro e o calcio. O noso organismo non ten a capacidade de almacenar esta vitamina, polo que hai que incluíla na dieta cada día. O tomate, as espinacas, a cebola, as coles ou a cenoria son algunhas hortalizas con gran cantidade de vitamina C.
O ácido fólico propicia a acumulación de proteínas no corpo. Esta vitamina do grupo B é coñecida pola súa importancia durante o embarazo. Axuda na formación de glóbulos vermellos e á produción de ADN.
O betacaroteno é un nutriente que o fígado converte en vitamina A. Esta vitamina ten propiedades moi beneficiosas para a vista, xa que evita a dexeneración ocular, as cataratas, a síndrome do ollo seco ou diferentes infeccións. Ademais, actúa como antioxidante, protexe do cancro, prevén a diabetes e fortalece o sistema inmunológico.
A vitamina E, como antioxidante, protexe ás células dos efectos negativos dos radicais libres.
E, por último, a vitamina K intervén na coagulación do sangue impulsando en correcto funcionamento do organismo.
O consumo de vitaminas e minerais resulta imprescindible para manter a diario unha dieta sa e equilibrada. Cada peza de froita ou verdura contén unha cantidade diferente de vitaminas e minerais, polo que é importante variar e non tomar sempre os mesmos alimentos. Canto máis variada, máis completa será a nosa alimentación.
Co obxectivo de concienciar á sociedade sobre a necesidade de incorporar as verduras na dieta diaria como hábito de vida saudable, a Asociación Española de Fabricantes de Vexetais Conxelados (ASEVEC) conta cun espazo en Internet, que permite coñecer con profundidade e rigor o mundo das verduras conxeladas. Na páxina pódese ver o proceso de fabricación das verduras conxeladas, as zonas españolas onde se recollen as diferentes variedades, consellos de saúde e ata o mellor tratamento e uso na cociña para elaborar pratos deliciosos.
