Imagen: Hannah and Simon
O próximo 1 de marzo entrará en vigor o novo Regulamento de Instalacións Térmicas nos Edificios (RITE). Entre outras novidades, esta normativa afecta as caldeiras de gas. O obxectivo do Regulamento é contribuír á mellora da calidade do aire nas cidades e “engadir elementos na loita contra o cambio climático“. Por esta razón, a normativa fomenta a instalación de caldeiras que permitan reducir a emisión de contaminantes.
A entrada en vigor do RITE afecta á incorporación de novos subsistemas de climatización ou de produción de auga quente sanitaria, a substitución ou ampliación dos equipos, o cambio de tipo de enerxía utilizada e a incorporación de enerxías renovables. Isto supón que, en xeral, calquera cambio na instalación térmica do fogar deberá axustarse á nova normativa, sen que sexa necesario cambiar a antiga caldeira por unha nova se esta funciona correctamente.
Conseguen un aforro de ata o 30% no consumo de enerxía e reducen ata nun 70% as emisións de óxido de nitróxeno e dióxido de carbono
En canto ás caldeiras, os aparellos que mellor responden os requisitos fixados polo RITE son as caldeiras de condensación. Esta tecnoloxía aproveita o vapor de auga que se produce nos gases de combustión e devólveo en estado líquido. Nunha caldeira convencional, este vapor de auga pérdese pola cheminea ou saída de fumes, pero nas de condensación convértese de novo en enerxía.
En comparación coas caldeiras convencionais, grazas a esta tecnoloxía conséguese un aforro de ata o 30% no consumo de enerxía e redúcense, ata nun 70%, as emisións de óxido de nitróxeno (NOx) e dióxido de carbono (CO2). Os resultados son importantes tanto en sistemas de calefacción de chan radiante como en radiadores .
O principal inconveniente é o seu prezo. Algúns modelos poden custar o dobre que as caldeiras convencionais, aínda que o investimento rendibilízase antes, xa que ao reducir o consumo conséguese reducir tamén a factura de gas. En definitiva, as caldeiras de condensación caracterízanse por sistemas de funcionamento máis eficientes, que contaminan menos, obteñen un gran rendemento e respectan o medio ambiente.
Marcado de estrelas
O novo RITE establece tamén unha data límite para a utilización de combustibles sólidos de orixe fósil e a instalación de caldeiras cuxo rendemento enerxético sexa inferior ao que marca a normativa. En concreto, as caldeiras que teñan marcado de prestación enerxética dunha estrela quedarán prohibidas a partir do 1 de xaneiro de 2010, mentres que as caldeiras con marcado de prestación enerxética de dúas estrelas e as caldeiras de carbón prohibiranse a partir do 1 de xaneiro de 2012.
As caldeiras dunha estrela quedarán prohibidas a partir de 2010, mentres que as caldeiras de dúas estrelas e as de carbón desaparecerán a partir de 2012
O marcado de estrelas esta regulado no Real Decreto 275/1995, que identifica as prestacións enerxéticas das caldeiras. De acordo a esta norma, levan unha estrela as instalacións cun rendemento a potencia nominal maior ou igual ao 84% e dous, aquelas cuxo rendemento é maior ou igual ao 90%. No entanto, a normativa das estrelas derrogouse en Europa no ano 2005, polo que é previsible a transposición desta norma no futuro e a modificación do RITE.
Respecto ao mantemento da instalación térmica, o RITE establece que é o seu titular ou usuario quen debe garantir o cumprimento da normativa. Así, hai que utilizar a instalación “de conformidade coas instrucións de uso” recollidas no manual que se entrega con cada caldeira e encargar a unha empresa autorizada a realización de calquera reforma, os labores de mantemento e as inspeccións que sexan obrigatorias.
