Nesta época do ano convén empezar a preparar o xardín para recibir á primavera. Pódese aproveitar para plantar exemplares de árbores ou arbustos de folla caduca, que acheguen sombra ao longo do verán. De todos os xeitos, se non se dispón de moito tempo para dedicar ao mantemento do xardín é recomendable escoller poucos exemplares deste tipo, xa que obrigan a retirar as follas que se vaian desprendendo das súas copas se se quere ter un xardín limpo.
Se hai que comprar as árbores, a mellor opción é adquirir exemplares a raíz espida, que son moito máis baratos. No entanto, débese ter en conta que non deben estar expostos ao aire nin ao sol, e que haberá que proporcionarlles moita humidade tras plantalos.
Tamén é unha época propicia para sementar plantas como a gipsófila, o altramuz, as zinias, plantas que florecen entre a primavera e o verán e cuxas ramas poden cortarse para encher vasos que decoren a casa. O mellor é regar todo o que se acaba de plantar, sobre todo se hai perigo de que poidan seguir producíndose xeadas, porque ao hidratar as plantas o dano que as baixas temperaturas poida provocarlles será menor.
Pódese así mesmo aproveitar para podar lixeiramente roseiras, vides e árbores e arbustos de folla caduca, co obxectivo de sanealos para que florezan sen problemas. Doutra banda, é recomendable abonar os exemplares achegándolles novo substrato, protexendo á vez as raíces, ou ben aplicándolles abono en formato líquido ou sólido.
