Os usos dunha lanterna son múltiples. Hai tantos modelos como situacións nas que utilizalas. O mercado cada vez conta cunha oferta máis ampla para satisfacer calquera necesidade. Por iso, antes de adquirir un produto ou outro, convén analizar a utilidade que se lle dará e as prestacións que serán imprescindibles.
Os traballos domésticos de bricolaxe esixen sistemas sinxelos de utilizar. Posto que non sempre se poderán suxeitar coas mans, é conveniente decidirse por modelos con sistema clip ou similar. Estes produtos engánchanse no cinto de traballo ou nun peto para facilitar o manexo das ferramentas e a localización da propia lanterna. Así mesmo, é conveniente que conte cun deseño ergonómico, mango antiescorregadizo, fácil acceso ao pulsador e ao compartimento que alberga as baterías e unhas dimensións manexables.
Un deseño ergonómico, un mango antiescorregadizo e a facilidade de acceso ao pulsador son prestacións que se deben valorar
En canto ás luces, algúns aparellos posúen varios tipos de luminarias ou diferentes modos de iluminación para empregar segundo a situación. A potencia das luces, así como a zona que son capaces de iluminar, varía segundo os modelos. Os máis actuais optan por sistemas LED ou de xenón, que emiten unha luz branca e brillante, cuxo rendemento é superior ao das lanternas convencionais.
Doutra banda, cando se realicen traballos en zonas húmidas ou de auga, pódese optar por lanternas con protección de goma. Estes aparellos dispoñen dunha cuberta especial para resistir o contacto coa humidade e evitar a deterioración do mecanismo interno. Incluso algúns modelos están preparados para soportar certa profundidade e iluminarse ao contacto coa auga.
O peso da lanterna é importante. Son aconsellables aparellos pouco pesados, manexables. Neste sentido, hai que ter en conta o peso da lanterna con baterías, xa que será desta maneira como haberá que utilizala durante os traballos. Algunhas lanternas chegan a superar o medio quilo sen pilas.
Para liquidar esta circunstancia, comercialízanse lanternas que funcionan sen baterías. Son aparellos máis sinxelos, limitados nas súas prestacións, pero que poden resultar moi útiles en determinados traballos. Hai que coidar, iso si, que a enerxía non se esgote durante o seu uso -os modelos máis estendidos cárganse ao axitalos- e ter en conta que a súa potencia é menor que a doutros aparellos con pilas, polo que a súa luz, tamén.
