Un traballo difererente e que, ademais, estea ben pago? Cociñeiros, camareiros, carretilleros, mozos de almacén, teleoperadores e dependentes son os empregos máis solicitados este verán, segundo a consultora Adecco. Pero hai outras ocupacións que, aínda que non se atopan na lista dos postos máis buscados, están ben pagos e ademais son orixinais. Ser guía de mergullo, cortador de xamón en eventos ou dedicarse a coidar casas son algunhas ideas. Neste artigo recóllense cinco destas propostas diferentes e indícase que requisitos deben cumprir os candidatos e os salarios medios que se cobran por traballar nelas.
1. Traballo de verán orixinal e ben pago? Guía de mergullo
As saídas a mergullar son unha atracción turística que cada vez se oferta máis nas praias de todo o mundo. Quen sexa experto mergullador -e teña as certificacións PADI e SSI- ten nesta afección unha saída laboral que quizais descoñecía, xa sexa como guía ou como instrutor de mergullo, que son traballos bastante demandados.
O traballo de guía (divemaster) consiste en levar a submarinistas que xa saben mergullar a realizar distintas rutas. Trabállase como freelance ou ben contratados por algunha compañía (pagan un seis euros por persoa que leven de excursión).
Os instrutores de mergullo encárganse de ensinar a mergullar (ou dar clases de perfeccionamento) a grupos de alumnos. Cóbrase de media uns 1.000 euros ao mes en tempada alta.
Son bos salarios, xa que este emprego adoita estar fóra de España en países onde a vida é moito máis barata. Os principais sitios para traballar como mergullador son Tailandia, Indonesia, Malaisia e Filipinas, México, Cuba, Honduras, Belice, o Mar Vermello ou as Maldivas.
Para gañarse a vida como guía ou instrutor é imprescindible coñecer idiomas e convén ter un bo equipo propio de mergullo.
2. Coidador de casas e mascotas
Viaxar con aloxamento pago a lugares afastados e, de paso, gañar un diñeiro? Pódese se un ofrécese como coidador de casas e mascotas, xa sexa uns poucos días ou durante longas tempadas. O funcionamento deste traballo é moi sinxelo: o propietario que necesita que alguén coide a súa vivenda, mascotas, xardín… durante as súas vacacións ou por ser unha segunda residencia pon un anuncio buscando a unha persoa que se encargue. Ás veces páctase unha remuneración e noutras o pago é vivir unha tempada nunha casa e cidade diferentes.
3. Cantante de cruceiro
En 2015 a industria de cruceiros xerou un total de 28.576 empregos en España, como recolle o Informe Anual de Contribución Económica de Europa. Entre os traballos que poden realizarse nestes barcos-hoteis destaca o de artista de salón (magos, animadores…), cantantes e bailaríns. Algúns destes empregos son para seis meses e están ben remunerados, con salarios de entre 1.400 e 2.700 euros ao mes.
Para poder conseguir estes traballos hai que ter experiencia demostrada neste tipo de funcións e convén ter coñecementos na súa preparación e montaxe, pois os artistas producen os diferentes espectáculos musicais. É vital contar con referencias de traballos anteriores e poder manexarse en varios idiomas, en especial en inglés.
4. Coidador dunha illa ou un castelo abandonado
O traballo de coidador de illas xorde de cando en vez. A primeira oferta en coñecerse internacionalmente foi para coidar unha illa paradisiaca en Australia en 2009. Ante o éxito da proposta cada ano ofrécese ese posto… e non só nas Antípodas. Ao norte de Gales, tamén se ofertou coidar unha illa (con 20.000 fantasmas, segundo a lenda) no mar de Irlanda, mentres que en Inchcolm (Escocia) a misión era custodiar un castelo abandonado do século XIII. Tamén se repiten estas ofertas nas Illas Virxes.
Ademais de contar con bo soldo, páganse todos os gastos de alimentación e vivenda. A parte menos divertida, para algúns, é a obrigación de atender aos visitantes que chegan a estas zonas nos meses de verán.
Quen desexe vivir a aventura e goce coa vida tranquila pode estar atento a este tipo de traballos, para os que se precisa coñecer idiomas.
5. Cortador de xamón
O verán é a tempada alta de vodas, recepcións, eventos ao aire libre… citas nas que un bo xamón cortado con precisión sempre triunfa. Os cortadores de xamón -cada vez máis especializados e que buscan profesionalizarse– deben reunir unha serie de cualidades: paciencia, precisión, ser sociables e ter don de xentes e certa arte.
Aínda que cada profesional (ou cada empresa coa que traballan) ten unhas tarifas, o prezo que se cobra polo corte dun xamón pode ser duns 140 euros por unhas dúas horas. Se se trata de dous xamóns, cobraríanse uns 240 euros por un catro horas de traballo, mentres que polo corte de tres obteríanse 300 euros por seis horas.
