A Comisión Europea (CE) prevé que a economía española volverá recuperar a senda do crecemento en 2011, aínda que será unha alza “moderada”, do 1%. Os prognósticos do Executivo comunitario, con todo, non ven o fin da caída do paro. Segundo os datos que manexan, o desemprego alcanzará o 20,5% da poboación activa en 2011.
A CE indica, ademais, que as altas taxas actuais de desemprego “poderían contribuír a unha redución adicional da confianza e o gasto dos fogares”. Esta situación non mellorará con algunhas das medidas fiscais anunciadas polo Goberno español na lei de orzamentos para 2010, como a eliminación de rebaixas impositivas e a subida do IVE, que segundo Bruxelas “poderían contribuír a unha redución adicional da confianza e o consumo privado”.
Con respecto ás previsións para este ano e 2010, o informe de outono presentado pola CE indica que España terá porcentaxes negativas de crecemento do produto interior bruto (PIB) tanto no presente exercicio (-3,7%) como no próximo ano (-0,8%), e terá que esperar ata o terceiro trimestre de 2010 para rexistrar crecementos trimestrais positivos.
A inflación situarase no -0,4% en 2009 pero volverá a territorio positivo o ano que vén (0, 8%) e alcanzará o 2% en 2011, superando a media da eurozona (1, 5%).
En canto ao resto da Unión Europea (UE), a Comisión espera unha recuperación gradual da economía europea, tras un descenso do Produto Interior Bruto (PIB) da eurozona do 4% en 2009. Para 2010 prevé un crecemento do 0,7% e unha alza do 1,5% en 2011. Respecto da inflación, prognostícase unha alza dos prezos na eurozona do 0,3% en 2009, e unha aceleración ao 1,1% en 2010 e ao 1,5% en 2011.
