Calquera consumidor debería poder cambiar de subministrador enerxético nun prazo dun mes e sen custo algún. Así o di un informe aprobado onte polo Parlamento Europeo, que subliña que as compañías só deberían desconectar aos seus clientes da rede como último recurso en caso de falta de pagamento, especialmente se se trata de consumidores vulnerables, como anciáns ou discapacitados. O informe sinala ademais que os prezos da enerxía deben ser “razoables e transparentes”.
A Eurocámara insta os Estados membros a garantir que o consumidor poida cambiar facilmente de subministrador “sen cargo algún e nun período non superior a un mes”. Ademais, lembra que o mercado europeo da enerxía segue caracterizándose pola existencia dun gran número de monopolios e considera que isto limita a liberdade de elección e a posibilidade de cambiar de subministrador “rápida e gratuitamente”.
Os eurodeputados solicitan aos Estados membros que establezan plans nacionais para facer fronte á “pobreza enerxética” e comuniquen ditas medidas á axencia europea reguladora. Tamén ven necesario examinar en que medida os distintos sistemas nacionais impositivos ou de seguridade social teñen en conta os riscos relacionados coa “pobreza enerxética”.
Prezos transparentes
Por outra banda, o informe recalca que os prezos da electricidade e do gas deben ser “razoables, fácil e claramente comparables e transparentes, e basearse no consumo real de enerxía”. Para lograr este obxectivo, os eurodeputados propoñen introducir simuladores de tarifas nas páxinas de Internet das compañías subministradoras e dos reguladores nacionais. Así mesmo, consideran que os países da UE deberían establecer un portelo único para toda solicitude de información dos usuarios.
Nesta liña de transparencia, a Eurocámara solicita aos Estados membros que financien a instalación de contadores “intelixentes” que ofrezan aos consumidores “unha información clara sobre o seu verdadeiro consumo de enerxía” e contribúan así a unha maior eficiencia enerxética. Tamén propón desenvolver un modelo de facturas tipo con información estandarizada para toda a UE.
Finalmente, o informe destaca que as autoridades reguladoras nacionais deberían supervisar os prezos e protexer aos consumidores contra prácticas comerciais desleais.
