A industria española de electrodomésticos pechou o primeiro cuadrimestre do ano cun aumento da facturación do 6,11% respecto ao mesmo período do exercicio anterior. O sector vendeu entre xaneiro e abril un total de 111.611 unidades máis que no catro primeiros meses de 2009, o que supón un incremento do 5,34%., segundo datos da Asociación Nacional de Fabricantes e Importadores de Electrodomésticos de Liña Branca (Anfel).
A industria comercializou no mes de abril 950 unidades máis, o que supón o cuarto rexistro positivo que experimenta o sector este ano, despois de que en xaneiro repuntaran as vendas un 3,24% e rompesen con 20 meses consecutivos de descensos interanuais. En febreiro vendéronse 33.541 unidades máis e no mes seguinte colocáronse 61.486 unidades máis que en marzo de 2009.
Durante o primeiro cuadrimestre de 2010, só as cociñas rexistraron un descenso significativo (-28,8%), mentres que creceron as vendas de secadoras (+29,8%), lavalouzas (+10,5%), vitrocerámicas (+9,6%), frigoríficos (+9,4%) e lavadoras (+5,2%).
Anfel representa a 14 fabricantes e importadores de electrodomésticos que supoñen máis do 92% do mercado total, cun volume de facturación conxunta superior a 2.500 millóns de euros, un total de 17 plantas produtivas e un persoal de máis de 10.000 traballadores.
