A maioría das entidades de cambio de Baleares non cumpre a normativa, segundo Ausbanc

• Autor: Por mediatrader
• Data de publicación: Mércores, 23deXullode2003

A Asociación de Usuarios de Servizos Bancarios (Ausbanc) presentou hoxe un estudo que pon de manifesto que a maioría das entidades de cambio de Baleares non cumpre coa normativa que esixe o Banco de España no cambio de divisas.

O estudo, realizado co cambio de 100 libras en 25 establecementos desa comunidade, demostra que o 58,33% das entidades que aplican comisións non informan da contía das mesmas, e aquelas que teñen anunciada a frase “Non Comisión”, son as que peor cambio ofrecen aos seus usuarios. Isto débese a que, aínda que non haxa comisión, o establecemento ten a potestade de fixar o tipo de cambio que desexe, chegando a oscilar, segundo o informe, entre un máximo de 140,78 euros por cada 100 libras e un mínimo de 119 euros pola mesma cantidade. Ausbanc di que esta liberdade para establecer as comisións e os intereses “pode supor, dependendo da entidade que se elixa, un incremento de ata o 18% do gasto turístico das vacacións”.

Outra grave infracción da normativa do Banco de España detectada por Ausbanc é a non identificación do titular da operación nun rexistro, algo que ocorre nun 88% dos lugares visitados pola asociación. “A identificación é fundamental para evitar o branqueo de divisas, algo moi habitual nos lugares turísticos”, afirma Carlos Hernández, delegado de Ausbanc en Baleares.

Para Hernández, as conclusións deste estudo son extrapolables a outros países, polo que recomenda aos máis de 800.000 españois que viaxan ao estranxeiro durante o mes de agosto, que se informen de cal é o tipo oficial de cambio do país onde se dirixen e que busquen en España a entidade que lles ofreza o cambio máis competitivo. En caso de facelo no país de destino, Ausbanc recomenda cambiar en lugares o máis afastados posible dos focos de concentración turística, “onde o viaxeiro adoita saír perdendo en comparación con outros lugares menos visitados”.