A Organización de Nacións Unidas (ONU) reduciu as súas estimacións de crecemento económico mundial para os próximos anos. No seu informe “Situación e Perspectivas da Economía Mundial 2012”, a organización reduce nun cinco décimas o crecemento do Produto Interior Bruto (PIB) mundial para o ano en curso ata o 2,8% e rebaixa as previsións para 2012 desde o 3,6% ata o 2,6%.
Respecto dos países avanzados, a ONU estima que as súas economías crecerán durante os dous próximos anos un 1,3%, o que supón unha redución das súas anteriores previsións en sete décimas para 2011 e en 1,1 puntos para 2012. En canto aos países en desenvolvemento, o organismo considera que crecerán un 6% este ano e un 5,6% o próximo, o que supón unha redución de dúas e catro décimas respecto das estimacións realizadas en xuño.
A ONU tamén realizou un prognóstico sobre a evolución económica da eurozona. Para a entidade, a rexión incrementará o seu PIB nun 1,5% en 2011 e nun 0,4% en 2012, o que supón unha rebaixa dunha décima e de 1,2 puntos, respectivamente. As previsións de crecemento para Estados Unidos tamén sofren un recorte, en concreto, a ONU recorta en nove décimas o incremento do PIB para 2011, ata o 1,7% e en 1,3 puntos para 2012, ata o 1,5%.
O informe recoñece unha retardación importante do crecemento en 2011, sobre todo nos países desenvolvidos, e anticipa que durante os dous próximos anos esta tendencia consolidarase. Tamén fai patente que a mellora económica esperada é insuficiente para afrontar os actuais niveis de desemprego nos países desenvolvidos e considera “asombroso” o índice de paro xuvenil en España, que supera o 40%.
Ademais, recoñece que as actuais previsións “poden ser demasiado optimistas” e augura unha nova e grave recaída da economía mundial. O organismo achaca a responsabilidade desta situación ás economías desenvolvidas, ás que culpa de deixar moitos problemas sen resolver tras a recesión experimentada en 2008.
