Os prezos das tarifas postais só subirán no próximos catro anos o que se incremente o Índice de Prezos ao Consumo (IPC), segundo declarou o conselleiro director xeneral de Correos e Telégrafos, Alberto Nuñez Feijoo. Este compromiso supón que Correos, no 2004, seguirá tendo os prezos máis baixos de todos os operadores postais europeos.
O responsable do ente público, que en xuño se converterá en sociedade anónima estatal, destacou que os seus servizos de repartición de correspondencia teñen un prezo que non alcanza nin a metade das tarifas medias que cobran os grandes operadores europeos. As 40 pesetas que custa a distribución dunha carta en España contrastan, segundo Núñez Feijoo, coas 67 pesetas que cobra polo mesmo servizo Francia, as 51 de Grecia, ou as 98 pesetas de Alemaña.
Entre as medidas paira mellorar a calidade do servizo e a atención ao cliente, Correos vai abrir nestes catro anos 134 novas oficinas en centros comerciais, polígonos industriais e arrabaldes das cidades, que se engadirán ás 1.840 das que dispón. Ademais, 69 oficinas ampliarán os seus horarios de atención ao público.
