O gasto público destinado á protección social en España supuxo en 2008 un 13,9% do Produto Interior Bruto (PIB), segundo datos do Anuario de Eurostat, a oficina estatística europea. Esta porcentaxe situou ao noso país catro puntos por baixo da media europea, situada no 18,2%.
España destinou o 6,1% do PIB a saúde, o 4,7% a servizos públicos xenerais e o 4,6% a educación. Todos estes capítulos tiveron un gasto inferior á media da Unión Europea (UE), que foi do 6,9%, 6,3% e 5,2%, respectivamente.
O gasto público en 2008 no conxunto da UE supuxo o 46,8% do PIB e o groso do mesmo foi a parar á protección social en todos os Estados membros sen excepción, aínda que a porcentaxe oscila de maneira notable e varía do 9,4% de Estonia ao 22,4% de Dinamarca, o 21,8% de Francia ou o 21,5% de Suecia.
Os países cun maior nivel de gasto público durante 2008 foron Suecia (53%), Francia (52%) Dinamarca (51,8) e Bélxica (50%), mentres que o menor gasto correspondeu a Eslovaquia, Luxemburgo, Bulgaria e Lituania, que gastaron entre o 34% e o 37% do PIB. O gasto público en España alcanzou o 41,1%.
