Gasolinas e gasóleos seguen subindo e volven marcar máximos históricos

• Autor: Por mediatrader
• Data de publicación: Sábado, 09deXullode2005

Os prezos medios de gasolinas e gasóleos manteñen a súa escalada alcista e onte volveron marcar máximos históricos en España, acumulando unhas subidas de ata o 17,6% no que vai de ano, segundo os datos que as estacións de servizo facilitan ao Ministerio de Industria, Turismo e Comercio.

O prezo medio da gasolina sen chumbo 95 pasou dos 84,3 céntimos de euro por litro do pasado día 3 de xaneiro (primeiro día laborable do ano) aos 99,4 céntimos de onte, é dicir, 14,9 céntimos máis, cun incremento do 17,6% no que vai de ano.

Na mesma liña, o custo da nova súper aditivada (gasolina 97) incrementouse 15 céntimos, pasando de 92,3 céntimos a 1,073 euros, cun aumento do 16,2%.

O prezo da sen chumbo de 98 octanos situouse onte en 1,092 euros por litro, fronte aos 93 céntimos de inicios de ano, o que supón unha alza do 17,4% (16,2 céntimos por litro).

Pola súa banda, o prezo do gasóleo A pasou dos 80,8 céntimos rexistrados o 3 de xaneiro aos 93,3 de onte, é dicir, 12,5 céntimos máis, cunha alza do 15,4%.

De igual modo, o novo gasóleo xa se encareceu 13,7 céntimos no que vai de ano, pasando de 83,7 a 97,4 céntimos, un 16,3% máis.