As empresas de distribución españolas perderon por causa dos furtos polo menos 1.700 millóns de euros no ano pasado, segundo o estudo “Prevención da perda descoñecida” que elaborou a Asociación de Fabricantes e Distribuidores. Este problema non incumbe só aos establecementos, senón tamén ao consumidor, xa que por mor dos roubos cada habitante paga, segundo os datos do Barómetro Europeo do Furto, 48,41 euros de máis. Este pago extra débese a que os establecementos incrementan os prezos para compensar as perdas polas subtraccións.
O estudo da Asociación de Fabricantes e Distribuidores achega outro dato sorprendente: o 30% dos furtos cométenos os propios empregados. O 50% cométenos os clientes e o resto débese a erros de administración. O perfil típico do ladrón é un home de menos de 30 anos, cun traballo precario e unha conduta reincidente que se inclina pola roupa, a música, os embutidos ibéricos e a perfumaría. O cliente que rouba faino por un valor medio de 30 euros, mentres que cando é o empregado o que rouba, a cifra ascende aos 60 euros.
Ademais dun perfil do ladrón tamén se pode definir a maneira en que se adoitan cometer os furtos. Segundo a Asociación Española de Codificación Comercial (AECOC), no 83% dos casos o hurtador pasa por caixa e abona algún produto á vez que esconde o produto roubado nalgunha peza de roupa ou en artigos do propio comercio, como o carro, a bolsa ou a cesta.
Debido a esta situación, nos establecementos amplíanse as medidas de seguridade, o que supón, segundo o Barómetro do Furto, un investimento de 468 millóns de euros. Unha medida cada vez máis habitual é incorporar mecanismos dentro do propio envase para impedir o roubo. Con todo, os métodos antirrobo máis utilizados seguen sendo os circuítos pechados de televisión e a vixilancia electrónica dos artigos.
No entanto, non son todo datos negativos xa que de ano en ano este tipo de delitos vai diminuíndo. O 2005 foi o terceiro ano consecutivo de descenso do índice medio europeo de perda descoñecida como porcentaxe de facturación. Ademais, en España este tipo de delincuencia é inferior á media europea (26,4%). O noso país atópase en sexta posición por detrás de países como Reino Unido e Finlandia, sendo Noruega e Islandia os que máis sofren este tipo de delito.
