A Autoridade de Servizos Financeiros de Reino Unido (FSA) impuxo unha multa de 7,7 millóns de libras (9,1 millóns de euros) á entidade británica Barclays por ofrecer asesoramento inadecuado na venda de dous fondos de investimento. A FSA destaca que esta multa é a maior imposta ata a data pola institución no país debido a erros na banca comerciante polo miúdo. Ademais, a firma bancaria podería ter que reembolsar aos seus clientes ata 59 millóns de libras (70,4 millóns de euros).
A FSA explica que entre xullo de 2006 e novembro de 2008 Barclays vendeu os fondos Aviva’s Global Balanced Income (the Balanced Fund) e Global Cautious Income (the Cautious Fund) a 12.331 persoas, na súa maioría xubilados, cun investimento total de 692 millóns de libras (826 millóns de euros). A autoridade detectou unha serie de graves “fallos” na forma na que estes produtos se venderon. En concreto, non garantiu que os fondos fosen adecuados para os clientes en vista dos seus obxectivos de investimento, as súas circunstancias financeiras e a súa experiencia e coñecementos, nin tampouco que a formación ofrecida ao persoal explicase de forma adecuada os riscos asociados a estes fondos.
Tamén considera que a entidade cometeu fallos ao asegurarse de que os folletos dos produtos e outros documentos ofrecidos aos consumidores explicaban de forma clara os riscos e non enganaban aos consumidores. Tampouco puxo en marcha procedementos adecuados para vixiar os procesos de venda e responder de maneira rápida cando os problemas se identificaron. A investigación tamén revelou que, aínda que a entidade británica identificou por si mesma que as vendas destes produtos era “potencialmente inadecuadas” en xuño de 2008, non tomou as medidas apropiadas a tempo. Dos máis de 12.000 investidores, 1.730 queixáronse do asesoramento recibido, o que equivale un de cada sete investidores.
Barclays xa revisou estas operacións durante a investigación e concluíu o 51% das vendas do Cautious Fund e o 74% das vendas do Balanced Fund deberían reconsiderarse. Ante esta situación, Barclays xa abonou uns 17 millóns de libras (20,2 millóns de euros) en compensación e a FSA estima que podería ter que abonar aos seus clientes outros 42 millóns de libras (50,1 millóns de euros).
“A FSA require ás firmas que teñan sólidos procedementos para asegurarse de que calquera consello dado aos consumidores é adecuado. Por tanto, cando se recomendan produtos de investimento, as empresas deberían ter en conta as circunstancias financeiras dos clientes, a súa actitude cara ao risco e o que esperan lograr co investimento”, afirmou a directora financeira de orde pública e crime financeiro da FSA, Margaret Cole. Destacou ademais que nesta ocasión Barclays non cumpriu con este requisito “e miles de investidores, moitos dos cales buscaban investir os seus aforros da xubilación, sufriron”. “Para empeorar as cousas”, Barclays non tomou medidas efectivas cando se detectaron as deficiencias nunha etapa temperá, apuntou Cole. “Cremos que estas infraccións son particularmente graves e merecen totalmente unha multa moi importante”, asegurou.
