O adianto de hora aforrará un 5% no consumo eléctrico en iluminación

• Autor: Por mediatrader
• Data de publicación: Sábado, 26 de Marzo de 2011

Esta noite comeza o horario de verán, polo que os reloxos deberán adiantarse unha hora (ás 2:00 horas serán as 3:00 horas), en cumprimento da Directiva Comunitaria que rexe o denominado “Cambio de Hora” e que afecta a todos os países membros da Unión Europea (UE). Segundo estimacións do Instituto para a Diversificación e Aforro da Enerxía (IDAE), entidade pública empresarial do Ministerio de Industria, Turismo e Comercio, o potencial de aforro en iluminación no noso país, polo cambio de hora, pode chegar a representar un 5% do consumo eléctrico en iluminación, equivalente a uns 300 millóns de euros. Desa cantidade, 90 millóns corresponderían ao potencial dos fogares españois, o que supón un aforro de 6 euros por fogar, mentres que os outros 210 millóns de euros restantes aforraríanse nos edificios do terciario e na industria, informou o departamento dirixido por Miguel Sebastián.

No entanto, para alcanzar este potencial de aforro deberase levar a cabo un comportamento responsable no fogar ao prescindir da iluminación artificial cando non é necesaria, así como a utilización de tecnoloxías de aforro en iluminación por aproveitamento da luz natural en edificios do terciario e en industrias. Estas tecnoloxías “amplamente experimentadas” consisten en fotocélulas ou sensores de luz que apagan ou regulan a iluminación artificial en función da luz natural achegada á zona, a través de xanelas ou lucernarios, explicou Industria.

O “Cambio de Hora” comezou a xeneralizarse, aínda que de maneira desigual, a partir de 1974, cando se produciu a primeira crise do petróleo e algúns países decidiron adiantar os seus reloxos para poder aproveitar mellor a luz do sol e consumir así menos electricidade en iluminación. Aplícase como directiva desde 1981 e é renovada sucesivamente cada catro anos. Desde a aprobación da Novena Directiva, polo Parlamento Europeo e Consello da Unión, en xaneiro de 2001, este cambio aplícase con carácter indefinido.

Industria lembrou que o carácter indefinido da aplicación do cambio de hora adoptouse por entenderse que “o bo funcionamento dalgúns sectores, non só o dos transportes e as comunicacións, senón tamén outros ramos da industria, require unha programación estable a longo prazo”. Ademais, a medida está avalada polas conclusións dun estudo sobre o seu alcance e efectos realizado por encargo da Comisión Europea e presentado ao Parlamento en 1999. Tras analizar de forma exhaustiva as repercusións da medida, o estudo concluíu que ten impactos positivos non só sobre o aforro senón sobre outros sectores como o transporte, as comunicacións, a seguridade viaria, as condicións de traballo e os modos de vida, a saúde, o turismo ou o lecer.