Tras incorporar a maioría das emendas presentadas polo Senado, o Pleno do Congreso dos Deputados aprobou hoxe de forma definitiva a reforma laboral. A norma concreta as causas económicas para o despedimento obxectivo, de 20 días de indemnización, que poderá xustificarse por perdas “actuais ou previstas” ou a “diminución persistente do nivel de ingresos”.
Ademais, xustifícase o despedimento por motivos de absentismo laboral, fixadas nun límite do 20% das xornadas hábiles durante dous meses consecutivos ou do 25% ao longo de catro meses descontinuos nun período dun ano, sempre que a media do persoal non supere o 2,5%. Recoñécese tamén a obrigación de facer fixos aos traballadores que durante tres anos permanecesen na mesma empresa.
A prestación por desemprego parcial calcularase por horas, e non por días, e será equivalente ao da redución da xornada autorizada. Destaca tamén a redución de 100 a 30 días do “período de graza” do que dispoñen os parados para rexeitar cursos de formación sen ser penalizados. Recóllense tamén modificacións no marco da intermediación laboral das empresas de traballo temporal (ETT) e as novas axencias de colocación.
O ministro de Traballo, Celestino Corbacho, agradeceu o modo no que se celebrou a tramitación, culminada coa rapidez “desexada” para eliminar “incertezas” e sen “desvirtuar” os obxectivos esenciais do decreto lei no que ten orixe, coa incorporación de máis de 70 emendas pactadas cos grupos. Corbacho destacou o “carácter equilibrado” do texto e asegurou que a súa aprobación coincide co inicio da recuperación económica nun escenario de post “crise”. Afirmou que a reforma respecta a realidade do modelo de relacións laborais en España, sen pór en cuestión as institucións básicas como a causalidade da contratación temporal e a tutela xudicial do despedimento, polo que se respectan “integramente” os dereitos dos traballadores.
