O Instituto Nacional de Estatística (INE) confirmou a entrada en recesión da economía española tras rexistrar unha caída do Produto Interior Bruto (PIB) do 0,3% no primeiro trimestre de 2012 con respecto ao trimestre precedente. Esta taxa é unha décima mellor do esperado polo Banco de España, que vaticinara un retroceso trimestral do 0,4%.
En canto á variación interanual do PIB, foi do -0,4%, fronte ao 0,3% do último trimestre de 2011. Este retroceso da economía española foi consecuencia “dunha achega máis negativa da demanda nacional, compensada parcialmente por unha contribución positiva da demanda exterior”, explica o INE.
O Banco de España tamén sinalou que a demanda interna aínda rexistra moita debilidade e a actividade continúa en retroceso. Só o sector exterior mostra unha fortaleza relativa, xa que as exportacións aumentan pero a menor ritmo. Ademais, todos os compoñentes da demanda nacional seguen en caída: o consumo dos fogares, o gasto das administracións públicas e o investimento empresarial e en construción.
Os datos publicados polo organismo de estatística este 30 de abril é unha estimación avance do PIB que proporciona unicamente información orientativa e, por tanto, podería non coincidir co dato que ofrecerá a Contabilidade Nacional Trimestral de España o próximo día 17 de maio, sinala o INE.
Coa estimación do PIB trimestral en termos corrixidos de efectos estacionales e de calendario dalgúns países da Unión Europea (UE), entre os que se atopa España, a Oficina de Estatística Europea (Eurostat) realiza unha primeira estimación do crecemento do PIB da UE e da Unión Económica e Monetaria. A obtención desta estimación avance forma parte da política de Eurostat e do Banco Central Europeo de ofrecer datos equiparables en tempo e calidade cos producidos nos Estados Unidos.
