O peso dos salarios dos traballadores europeos cada vez é menor na economía. Un estudo difundido onte pola Comisión Europea sobre o mercado laboral revela que a cota dos salarios no Produto Interior Bruto (PIB) pasou dun máximo do 70% en 1975 ao 58% en 2006.
Nos últimos meses, os máximos dirixentes da economía europea han advertido en varias ocasións da perda de peso dos salarios en beneficio das rendas do capital e os beneficios empresariais.
No caso de España, os datos manexados pola Comisión indican que o peso dos soldos na riqueza nacional ha diminuído desde o máximo do 67,9%, alcanzado en 1976, ao 54,5% rexistrado o ano pasado, tres puntos por baixo da media comunitaria.
Bruxelas afirma que o principal factor para explicar a caída do peso das rendas salariais no PIB é o progreso tecnolóxico, e resta importancia á repercusión da globalización e á liberalización dos mercados. Como consecuencia da innovación, aumenta a cota dos traballadores con máis cualificación e diminúe a dos menos cualificados, explica o Executivo da UE.
O principal factor que explica a caída do peso das rendas salariais no PIB é o progreso tecnolóxico
Os expertos temen que de non cambiar esta tendencia, o cada vez menor peso dos ingresos do traballo no PIB acabe afectando á cohesión social en Europa. Para remediar a situación, o primeiro ministro de Luxemburgo e presidente do Eurogrupo (ministros de Finanzas da zona euro), Jean-Claude Juncker, aposta por unha repartición máis equilibrada das ganancias empresariais.
Precariedade laboral
O informe de Bruxelas indica ademais que España é un dos países europeos con maior precariedade laboral. Segundo os seus datos, preto da metade dos traballadores españois entre 25 e 29 anos teñen un contrato temporal, o dobre que a media da UE.
