Algunhas compañías gasistas e eléctricas, en concreto, Gas Natural e Endesa, poderían desenvolver prácticas “abusivas” para captar clientes de forma “pouco ética” ou “fraudulenta”, segundo informou onte a Organización de Consumidores e Usuarios (OCU), que recibiu nos últimos días numerosas consultas e queixas de cidadáns.
Hai dous tipos de denuncias. Por unha banda, os referir# a operarios acreditados que aproveitan a revisión das instalacións de gas dos domicilios particulares para tratar de conseguir clientes e, por outro, as que se refiren a chamadas telefónicas nas que se ofrecen descontos nas tarifas enerxéticas cuxa aceptación supoñen un cambio de contrato. No primeiro caso os usuarios afectados aseguran que asinaron uns documentos, a instancias de operarios de Gas Natural que se personaron no seu domicilio, facendo constar que a revisión das instalacións estaba realizada. Segundo OCU, o que non explican os representantes da empresa gasista é que esta documentación inclúe unha autorización para que Gas Natural tramite a baixa coa compañía eléctrica que o usuario ten para que pase a ser cliente da empresa que preside Antoni Brufau. En varios casos, engade a organización, “dáse o agravante de que a firma non é a do titular do contrato”.
A segunda actuación denunciada ante OCU é a practicada por Endesa que, tras recibir resposta afirmativa dos usuarios para acceder a descontos na súa tarifa eléctrica, pasa a tramitar o cambio de empresa coa comercializadora de Endesa sen a firma necesaria do consumidor.
Ante estas actuacións das compañías enerxéticas, OCU advirte de que cambios contractuais como os denunciados supoñen, de feito, o paso dos consumidores afectados ao mercado liberalizado da enerxía, “o que implica na maioría dos casos que quedan suxeitos a contratos con cláusulas que poden ser prexudiciais”.
Para a organización, estas prácticas “supoñen un engano para o usuario e lembran á lamentable maneira de captación dalgunhas compañías de telefonía que xa foron denunciadas”. Por todo iso, OCU avanzou que porá en coñecemento das autoridades competentes estes feitos para evitar que se repitan en España casos como do Reino Unido, onde o regulador enerxético Energywatch recibiu un 20% de reclamacións por prácticas similares.
Así mesmo, lembrou que a organización xa denunciou hai uns meses que a liberalización eléctrica e do gas era “un fracaso”, dada a ausencia de competidores reais. “Pero OCU non se podía imaxinar que a escaseza de ofertas interesantes para os usuarios puidese suplirse por unhas condutas fraudulentas por parte das compañías para obter un puñado de novos clientes”, conclúe o comunicado.
