A crise xerou numerosas situacións de extrema necesidade. Por iso, cando se ten a posibilidade de obter un traballo, para moitos parados é difícil rexeitalo. Diso aprovéitanse quen, baixo un formato de aparente legalidade, brindan ofertas de emprego que esconden intereses delituosos. Ficticias e ofertadas a través dun correo electrónico de maneira insistente, teñen condicións moi atractivas para todo tipo de supostos traballos. Nesas misivas incídese en que se superou unha fase de selección e dáse como contacto unha dirección de correo. Como se explica nesta reportaxe, ante estas evidencias, hai que porse en garda para non caer na trampa e ser vítima dunha estafa, ou mesmo formar parte dunha armazón de actividades ilegais. E, ademais, sempre hai que denuncialo.
Radiografía da fraude e como denuncialo
Nos últimos meses detectouse unha campaña cuxa única finalidade é a captación de “muleros”, persoas que, sen sabelo, realizan transaccións económicas cuxo obxectivo é o branqueo de capitais, segundo afirman desde o Grupo de Delitos Telemáticos da Garda Civil (GDT). Os mesmo corpos de seguridade tamén advirten de que, en caso de aceptar este ofrecemento, o traballador pode verse envolvido nunha investigación criminal e, mesmo, ser acusado como cooperador necesario nun posible delito de estafa. Por todo iso, se se aceptou unha oferta deste tipo, débense denunciar estes feitos e cancelar as transaccións que se puideron realizar.
Se se aceptou unha oferta deste tipo, débense denunciar os feitos e cancelar as transaccións realizadas
Como se pode denunciar? Na web do GDT hai un formulario que, unha vez completado, xera un documento PDF que se debe imprimir e presentar nun centro xudicial ou policial para formalizar a denuncia. Desta maneira, pódense acurtar os tempos de tramitación, xa que en España aínda non está contemplada legalmente a denuncia telemática ou en liña. Neste sentido, hai que lembrar que, conforme á Lei de Enjuiciamiento Criminal (Art. 264 e ss.), requírese a personación física para poder asinar e rubricar a mesma. Por iso, os afectados non terán máis remedio que ir en persoa a entregala para formalizar o requirimento contra estas actuacións.
Por outra banda, se se desexa obter unha certificación con validez xurídica desta comunicación, pódese formalizar a través das aplicacións para plataformas móbiles (iPhone, Android e Windows Phone) ou o portal de navegación móbil da Garda Civil, accesible a través de terminais móbiles.
Axuda e apoio dos corpos de seguridade
Os usuarios que pasen por esta desagradable situación terán o apoio dos corpos de seguridade, a través das seguintes actuacións:
Presentación dunha reclamación sobre estes feitos, no que se lle diagnosticará se é obxecto dunha fraude na procura de emprego , e máis en concreto no caso dos “muleros”.
Achega de ferramentas de apoio para obter unha certificación con validez xurídica que sirva aos afectados para canalizar as súas reclamacións.
Dar información para presentar denuncia a través da personación física co fin de poder asinar a mesma.
Axuda para denunciar os feitos e cancelar as transaccións que puidesen realizarse para evitar verse envolvido nestas actividades delituosas.
Son xa miles os usuarios que foron vítimas destes enganos que se propagan por mensaxes por correo electrónico. Pero, como poden detectarse estas accións ilegais?
Xorden de forma espontánea, e non a un requirimento do usuario, que nin tan sequera solicitou o servizo ou posto laboral (de feito tamén os reciben persoas que levan traballando de maneira estable moitos anos).
O correo destas supostas empresas de colocación non coincide con ningunha legalmente implantada, aínda que en moitos casos o seu dominio é similar.
Os correos van remitidos por diferentes titulares, case nunca é a mesma persoa.
Ante todas estas evidencias, o primeiro que haberá que facer é designar estas mensaxes como “correo non desexado” para evitar que nos molesten. E, se se reciben moitas mensaxes desta índole, notificarase ás autoridades policiais para que tomen as medidas oportunas. Mesmo pode presentarse unha demanda xudicial.
