Desde hoxe mesmo os usuarios poden solicitar ás súas compañías de telefonía a desconexión do acceso aos números con prefixo 905, informa a organización de consumidores FACUA, que afirma recibir máis de 1.500 casos de usuarios que denuncian a facturación de chamadas falsas a estas liñas.
Esta asociación lembra que se trata, tras a recente subida dos prezos das chamadas a eses números, da segunda medida que entra en vigor das incluídas na resolución de 4 de decembro de 2008 da Secretaría de Estado de Telecomunicacións (Setsi), pola que se atribúe o código telefónico 905 á prestación de servizos de tarificación adicional.
Dita resolución establece que os usuarios poden exercer o seu dereito de desconexión unha vez transcorrido un mes desde a súa publicación no Boletín Oficial do Estado (BOE), o pasado 12 de decembro. “Con esta norma, a Setsi tamén regalou ás telefónicas e as empresas responsables destas liñas unha substanciosa subida de tarifas”, denuncia FACUA.
Desde o pasado 13 de decembro, os prezos máximos fixados para as chamadas a teléfonos con prefixo 905 seguido dun 4 (os dos concursos televisivos) son un 9,1% máis caros que os aplicados anteriormente por Telefónica e Ono, sinala a organización.
“Ambas as compañías xa aplicaran unha importante subida de tarifas nestas chamadas durante 2008, que pasaron de 0,95 a 1,10 euros máis IVE e agora, coa decisión da Secretaría de Estado, sitúanse en 1,20 euros (sempre máis IVE). A subida acumulada en 2008 é de nada menos que o 26,3%”, explica FACUA.
