O Ministerio de Sanidade, Servizos Sociais e Igualdade elaborou un decálogo de recomendacións para os pais sobre a seguridade dos xoguetes, co obxectivo de evitar accidentes entre os menores. Entre outros consellos, o departamento dirixido por Ana Mato lembra a importancia de comprar só artigos coa etiqueta CE, xa sexa no mesmo xoguete ou na súa embalaxe. “Este marcado é a garantía do fabricante de que o produto cumpre coas regras de seguridade da Unión Europea”.
O decálogo aconsella adquirir os xoguetes en tendas ou provedores de confianza, que en xeral aceptan devolucións. Tamén é importante comprobar os xoguetes que se lles regalan aos nenos nestas datas, para evitar falsificacións ou produtos pouco seguros.
Os xogos deben ser adecuados á idade, a capacidade e a destreza do neno aos que van destinados. Os que non están dirixidos ao seu grupo específico de idade “poderían provocarlle lesións”, alerta o decálogo. Ademais, hai que cerciorarse de que os xoguetes non teñan pezas pequenas desmontables, se están destinados a nenos menores de tres anos, xa que poderían producir asfixia. Recoméndase seguir as instrucións para montar e utilizar correctamente o xoguete, e gardalas en lugar seguro. Hai que ensinar os pequenos a ordenar os seus xoguetes e a non deixalos en lugares de paso para evitar accidentes.
O decálogo de Sanidade lembra que se debe permanecer atento mentres os nenos xogan, para asegurarse de que todos os xoguetes empréganse do modo previsto. No caso de patíns, bicicletas ou motos, deben levar sempre con casco e equipo de protección.
Comprobar cada certo tempo o estado dos xoguetes para cerciorarse de que non estean deteriorados ata o punto de supor un risco para a saúde. Tamén debe eliminarse todas as embalaxes e asegurarse de que os nenos non xogan cos de plástico, pois poden supor un risco de asfixia. Por último, aconséllase informar de calquera problema de seguridade dos xoguetes ao fabricante ou ao vendedor ao que se comprou.
