Trucos rápidos para recoñecer un billete falso este Nadal

• Autor: Por EVA SAN
• Data de publicación: Martes, 05 de Xaneiro de 2016

En Nadal, aumenta a circulación de billetes. Úsanse con maior frecuencia para comprar e vender e ata para intercambialos por outros. Ninguén está libre de toparse cun falso. Como evitar que nos coen un billete falso este Nadal? E como recoñecelo? Estes pasos axudarán.

• Tocar. O Banco Central Europeo asegura que un billete auténtico pódese recoñecer ao tacto pola súa textura, que é firme e resistente. Pero hai outros elementos que facilitan a identificación dun bo.

  Os billetes verdadeiros teñen relevo na imaxe principal, nas letras e na cifra de maior tamaño. E, na serie europea, incorporan bandas de liñas curtas en relevo nos bordos esquerdo e dereito do anverso.

• Mirar.Tamén se pode saber se un billete é auténtico se se mira a contraluz. No espazo en branco da parte esquerda deben aparecer as imaxes difusas dunha xanela e o valor do billete. Nos billetes de cinco euros e os novos de dez euros tamén ten que distinguirse o debuxo de Europa, o personaxe da mitoloxía grega que presta o seu nome ao noso continente. Respecto ao fío de seguridade, nel debe deixarse ver o valor do billete e a palabra “euro” ou o seu símbolo.

• Virar. Na parte de atrás, á dereita, hai unha especie de banda prateada. Se o billete é auténtico, debe aparecer o valor do billete, o nome ou o símbolo do euro e unha especie de holograma co retrato de Europa.

• Microtexto. Algunhas zonas do billete teñen unha serie de caracteres de tamaño reducido. Esta microimpresión pode lerse cunha lupa. Os caracteres non son borrosos, senón nítidos.

• Baixo unha luz ultravioleta, o papel non resplandece, é dicir, non emite luz e está escuro.

• Pódense apreciar pequenas fibras embebidas no papel. Cada unha delas mostra tres colorees diferentes.

• No anverso, as estrelas da bandeira da UE, os círculos pequenos e as estrelas grandes resplandecen en amarelo. Algunhas outras zonas tamén brillan en amarelo.