A recuperación económica en España non chegará, “no mellor dos casos”, ata finais de 2011 ou principios de 2012. Así se desprende do Consenso Económico de PricewaterhouseCoopers (PwC), correspondente ao terceiro trimestre do ano.
O documento reflicte que a maioría dos economistas e empresarios consultados, o 55%, considera que a conxuntura económica española manterase igual no próximos seis meses, aínda que a porcentaxe de quen pensan que mellorará aumentou do 20% ao 38% en relación co trimestre anterior.
Con respecto á reactivación económica, un 48,8% asegura que dependerá do comportamento da conxuntura internacional e, especialmente da europea. Outro 32,5% estima que a recesión se manterá “ata que o Goberno e os axentes sociais acorden unha reforma en profundidade do modelo económico”.
O informe de PwC sinala que o crecemento do Produto Interior Bruto será do -3% en 2009 e do -1,3% en 2010. En canto á situación financeira das empresas, o 60% dos enquisados din que se manterá igual no próximos seis meses e aumenta en case dez puntos, ata o 22,9% os que cren que mellorará.
En materia de inflación, as súas estimacións apuntan a que a finais deste ano os prezos pecharán cunha caída do 0,6% e para xuño de 2010 estes estarán xa en positivo, cun crecemento do 0,7%.
En relación ao sistema financeiro español, a maioría dos enquisados, o 74,7%, considera preocupante a súa situación, aínda que un 54,4% entende que “a pesar de todo sigue sendo comparativamente mellor aos dos países da nosa contorna”.
