A Axencia Espacial Europea (ESA) detectou por infravermellos, a través do observatorio espacial Herschel, un “furioso” vento de gas molecular que se afasta a gran velocidade da nosa galaxia e que podería frear en seco a formación de novas estrelas, xa que se orixinan a partir deste gas.
Os ventos detectados son “extraordinariamente rápidos”, indica a axencia, que sinala en concreto que a maior velocidade rexistrada é de 1.000 quilómetros por segundo, o que supón unha cifra 10.000 veces superior á dos furacáns que se producen na Terra.
A ESA destaca que é a primeira vez que se observa “de maneira inequívoca” unha corrente de gas destas características na Vía Láctea e, ademais, sinala que é “un descubrimento importante porque a formación de estrelas parte do gas molecular, e estas fuxidas rouban á galaxia a materia prima que necesita para facer novas estrelas”. “Se as correntes son o suficientemente poderosas, mesmo poderían deter a formación de estrelas completamente”, apunta o autor principal do traballo, Eckhard Sturm, científico do Max-Planck-Institut für extraterrestrische Physik.
Este achado permitirá estudar que significan estes fluxos na evolución galáctica e as súas características, asegurou Sturm. A este respecto, o investigador explicou que estes ventos poden xerarse pola “intensa emisión de luz e partículas das estrelas novas” ou por ondas “de choque da explosión de estrelas vellas”. Tampouco descartou que sexan consecuencia da radiación emitida na materia que se arremolina ao redor dun buraco negro no centro da galaxia xa que, segundo Sturm, os ventos máis rápidos “parecen vir das galaxias que conteñen núcleos activos de galaxias máis brillantes, nos que un buraco negro xigante aliméntase da súa contorna”.
O equipo de Sturm probará agora esta idea con outras galaxias na súa mostra. O científico explicou que espera que os resultados destas novas probas poidan ser un avance para explicar como se forman algunhas galaxias elípticas.
