A Federación Española de Familias Numerosas (FEFN) presentou un recurso contra a Administración do Estado, “por non acatar o disposto polo Tribunal Supremo e discriminar aos alumnos dos centros privados” nas axudas para a compra de libros de texto e material didáctico e informático.
Recorreuse a Resolución da Secretaría de Estado de Educación e Formación Profesional de 18 de maio de 2009, pola que se convocan axudas dirixidas a alumnos matriculados en centros sostidos con fondos públicos, tanto públicos como concertados.
Segundo a FEFN, a exclusión dos estudantes de centros privados desta convocatoria “é contraria ao ditado hai uns meses polo Tribunal Supremo”, que declarou a nulidade dun artigo do Regulamento de Familias Numerosas que establecía trato preferente nas axudas para libros de texto aos fillos de familias numerosas matriculados en centros públicos e concertados. “O Supremo viu unha clara discriminación dos alumnos escolarizados en colexios privados, o que supuxo a nulidade deste punto do Regulamento, que foi substituído por unha redacción que alude aos centros educativos, en xeral”.
A FEFN considera inxusto discriminar aos alumnos en función da titularidade do centro no que estudan, sobre todo, “nun país no que os pais teñen dereito á libre elección de centro, pero non sempre poden exercela”. “Moitas familias non obteñen praza nun centro concertado e recorren a un colexio privado”, sinalaron. A Presidenta da asociación, Eva Folgado, engadiu que é “inxusto” pensar que todos os pais con fillos en centros privados “teñen moito diñeiro”.
Coa súa medida, a FEFN espera que o Supremo recoñeza a nulidade desta convocatoria e obrigue á Administración a convocar novas axudas, sen limitacións segundo o tipo de centro.
