Este verán ofrecerase na Universidade Internacional Menéndez Pelayo (UIMP) a oferta máis ampla da súa historia, cun total de 140 cursos, segundo destacou onte en Santander o seu reitor, Luciano Parello, quen subliñou tamén a internacionalización da actividade académica do centro e a “importante renovación” do profesorado que participa no evento.
Esta programación para o verán de 2006, que é a primeira do actual equipo reitoral, dará comezo o 19 de xuño e finalizará o 15 de setembro, tras case tres meses de actividade nos que se impartirán unhas 5.000 horas lectivas e contarase cuns 2.000 profesores. Este verán fíxose “un esforzo engadido” para confeccionar unha programación que “teña densidade” e presente novidades, afirmou Parello.
Os organizadores desta cita en Cantabria tamén buscaron aumentar a presenza feminina entra os responsables dos cursos, que alcanza a paridade, e abordar temas monográficos de interese internacional, como a economía latinoamericana e a seguridade alimentaria. Nos cursos e encontros trataranse outros asuntos de actualidade como a política do chan, o desenvolvemento sustentable, a fame e a pobreza e a enerxía, entre outros.
Así mesmo, a UIMP sumarase coa súa programación a algunhas das conmemoracións de 2006, como os cen anos de Francisco Ayala e, como adianto xa que é en 2007, o 25 aniversario do Estatuto de Autonomía de Cantabria. A programación ten un orzamento de 4,6 millóns de euros, que se financian mediante as matrículas (25%), os patrocinadores (67%) e a achega do Ministerio de Educación e Ciencia (7%).
Entre os directores dos cursos atópanse os escritores Juan Goytisolo, Manuel Vicent e Enrique Vila-Matas; o responsable do Centro de Astrobiología, Juan Pérez Mercador; o director do Instituto de Astrobiología da NASA, Bruce Runnegar; o reitor da Universidade Carlos III, Gregorio Peces-Barba; o teólogo Jon Sobrino; a bailaora María Pagés, e o dramaturgo Calixto Bietio.
