Un equipo internacional de investigadores, entre eles un científico do Consello Superior de Investigacións Científicas (CSIC), achou os ollos fósiles máis complexos e antigos do mundo nun xacemento paleontológico ao sur de Australia. Os ollos, “moi ben conservados”, pertenceron a unha especie de artrópodo mariño que poboaba a Terra fai 515 millóns de anos e que tiña un modo de vida similar ao dunha lagosta, informou o organismo público de investigación.
Os ollos, dun centímetro de diámetro, están formados por miles de pequenas lentes, igual que os dalgúns insectos e crustáceos da actualidade. Pertenceron con probabilidade a un animal grande, activo e cazador e, polo tamaño do ollo, os científicos cren que podería medir uns 20 centímetros. “Xa se acharon antes ollos compostos fósiles, pero nunca tan complexos. Cada un está formado por máis de 3.000 pequenas lentes, o que facía que o animal tivese unha visión moi aguda. Ademais, unha zona de lentes máis grandes, similar á que teñen as libélulas, permitíalle ver en ambientes de pouca luminosidade”, detallou o investigador do CSIC no Instituto de Geociencias, Diego García-Bellido.
O achado tivo lugar nunhas rocas da localidade de Emu Bay Shale, na Illa Canguro. Os sedimentos que conteñen os fósiles depositáronse pouco despois da “explosión” de diversidade do período Cámbrico, un evento evolutivo que marcou, fai entre 540 e 520 millóns de anos, a aparición de case todos os grupos animais actuais, como os artrópodos, moluscos, equinodermos ou cordados, explicou o CSIC.
Ata agora coñecíanse os ollos mineralizados dos trilobites, un tipo extinto de artrópodos emparentados cos cangrexos, os escorpiones ou os insectos, que poboaron os océanos durante o Paleozoico (fai entre 540 e 250 millóns de anos). “Os ollos do artrópodo que atopamos son moito máis elaborados que os dos trilobites con quen convivían: teñen 3.000 lentes en comparación coas 100 dos trilobites e o diámetro de cada unha delas tamén é maior”, asegurou García-Bellido.
As escavacións en Emu Bay Shale, lideradas polo South Australian Museum, comezaron en 2007. Desde entón, este equipo de investigadores sacou á luz máis de 5.000 exemplares dunhas 50 especies mariñas distintas, moitas aínda sen describir. Entre os fósiles atopados, situados só a un metro e medio de profundidade, destacan varias especies de trilobites, varios tipos de artrópodos non emparentados con ningún grupo actual, numerosos vermes mariños, algas, esponxas e braquiópodos, entre outros. O último achado aparece recollido no último número da revista “Nature”.
