Despois de varios anos de estudo en dúas poboacións estremeñas, un grupo de biólogos da Universidade de Estremadura (UEx) descubriu que a leguminosa Anagyris foetida pódese considerar como o primeiro caso de Europa de planta ornitófila, o que quere dicir que é polinizada principalmente por aves.
Coñecida como “altramuz hediondo ou do diaño” e, na comarca de Olivenza (Badaxoz) como “fadagosa”, esta leguminosa é unha especie arbustiva, relíctica da flora subtropical terciaria, que florece durante os meses de outono e inverno, período que aproveitan certas especies de paseriformes como “currucas” (Sylvia atricapilla e S. melanocephala) e “mosquiteros” (Phylloscopus collybita) para visitar as súas flores en busca de néctar, á vez que recollen e transfiren eficazmente o pole, facilitando, por tanto, a polinización.
Aínda que o descubrimento constatouse na comarca de Olivenza, posteriormente comprobouse tamén noutros lugares de España (varias poboacións de Andalucía Occidental e da Comunidade Valenciana). Esta leguminosa, de distribución fundamentalmente mediterránea, vive nas Illas Baleares e no leste e sur da Península Ibérica, formando parte de matogueiras mediterráneas, sendo escasa e rara.
Este estudo, cuxos resultados se publicaron durante o mes de setembro na revista “Oikos”, forma parte dun proxecto de investigación máis amplo subvencionado polo Ministerio de Educación. Dada a importancia do fenómeno, único ata agora en Europa, a especie está a ser sometida a un estudo integral de Bioloxía Reprodutiva.
