O Consello de Ministros do pasado venres deu o seu visto e prace ao Real Decreto que regula a nova selectividade. A renovada Proba de Acceso á Universidade (PAU) celebrarase por primeira vez en xuño de 2010.
O Ministerio de Educación afirma que a nova PAU permitirá aos alumnos mellorar a nota presentándose a unha proba voluntaria sobre materias relacionadas cos estudos universitarios que queiran seguir. Ademais, explica que o formato de resposta deberá garantir a aplicación duns criterios de avaliación obxectivos que serán aprobados e dados a coñecer previamente, de maneira que se garanta unha corrección máis xusta e con máis garantías para os alumnos.
Así, a proba “valorará a madurez do alumno á hora de elixir o seu futuro académico e avaliará os coñecementos vinculados ao título de Grao que queira cursar”, asegura Educación. Outra novidade é que incorporará unha proba oral de lingua estranxeira que poderá ser en inglés, francés, alemán, italiano ou portugués, a partir do curso 2011/2012.
Dúas fases
A nova PAU divídese en dúas fases “que permiten aumentar as opcións de elección dos alumnos, valorar as materias nas que o alumno obtén unha mellor cualificación e vincular dunha maneira máis directa o bacharelato e a Universidade”, apunta o Ministerio.
Na fase xeral, do mesmo xeito que na actual selectividade, os estudantes deberán examinarse das materias comúns (lingua castelá e literatura, lingua estranxeira, historia ou filosofía e, no seu caso, lingua cooficial) e incorporarase unha materia de modalidade elixida polo alumno, é dicir, unha das materias especializadas asociadas a unha do tres vías que os alumnos cursan en bacharelato (Artes, Ciencias e Tecnoloxía, ou Humanidades e Ciencias Sociais).
Da mesma maneira que sucede actualmente, os alumnos que obteñan un cinco de media entre a nota de bacharelato (que contará un 60%) e a cualificación obtida na fase xeral da PAU (que contará un 40%), poderán acceder á Universidade sempre que obtivesen un mínimo de catro puntos nesa primeira fase.
A fase específica, pola súa banda, permitirá aos alumnos que queiran acceder ás facultades que limitasen o número de prazas, mellorar a nota de acceso. Neste caso, os alumnos examinaranse doutras materias de modalidade diferentes ás da fase xeral, aínda que non as cursaron durante o bacharelato, que estean asociadas á rama de coñecemento do Grao no que queiran ser admitidos.
Cada un dos dous exames voluntarios suporá sumar ata un punto á nota final do alumno, ou dous se a Universidade sinalou esa materia como unha das prioritarias. A comezo de cada curso as universidades sinalarán as materias que consideran prioritarias para os seus distintos ensinos, co obxectivo de que os alumnos poidan planificar o seu bacharelato en función do que queren facer no futuro. “Con este sistema, os alumnos accederán á Universidade cunha mellor preparación previa, que lles permitirá afrontar con maior garantía de éxito os estudos universitarios”, conclúe Educación.
