O Ministerio de Educación creará un Rexistro Nacional de Titulados Universitarios Oficiais que recollerá os datos dos futuros estudantes que conclúan os seus estudos de Grao, Máster ou Doutoramento, e os de quen se atopan no Rexistro Nacional de Títulos Universitarios Oficiais. Créase así un arquivo único de referencia de Titulados Universitarios Oficiais.
A medida é unha das principais novidades contempladas no Real Decreto aprobado hoxe polo Consello de Ministros e que establece os requisitos, o formato común e o procedemento administrativo para a expedición dos títulos correspondentes aos ensinos universitarios oficiais de Grao, Máster e Doutoramento.
Ademais, o Decreto desenvolve o formato Suplemento Europeo ao Título que poderán expedir as universidades españolas co fin de promover a mobilidade de titulados españois no Espazo Europeo de Educación Superior (EEES). Nel constarán todos os detalles persoais, académicos e, no seu caso, profesionais inherentes a cada titulación conseguida polos alumnos, o que servirá como elemento de transparencia para a realización de estudos dentro do EEES.
O Executivo central tamén aprobou a regulación da expedición de títulos conxuntos, tanto entre universidades españolas como entre españolas e estranxeiras, “o que supón un respaldo ao principio de mobilidade que inspira o Espazo Europeo de Educación Superior”, sinalou o departamento dirixido por Anxo Gabilondo.
Por último, o texto do Real Decreto establece que os efectos plenos dos títulos universitarios oficiais obtéñense desde a data da completa finalización dos estudos, e non desde a data de abono da taxa como ocorría ata o momento.
