Un total de 271.499 alumnos presentáronse ás Probas de Acceso á Universidade (PAU) en 2011, un 10,9% máis con respecto ao ano anterior. Do total de presentados, o 55,3% eran mulleres. Os datos publicados polo Instituto Nacional de Estatística (INE) destacan ademais que a porcentaxe de aprobados alcanzou o 85,8%, cunha cifra similar entre mulleres e homes (85,9% fronte a 85,7%).
Na convocatoria de xuño presentáronse 187.431 alumnos, dos cales aprobou o 91,5%. Na de setembro, dos 46.261 estudantes presentados aprobou o 76,6%. Pola súa banda, nas probas de acceso para maiores de 25 anos presentáronse 31.853 alumnos, un 2,6% máis que no ano anterior, e o 69,2% superounas. Dos estudantes presentados nestas probas, o 4,7% fíxoo en universidades privadas.
No segundo ano de organización das probas para maiores de 45 anos, houbo 5.954 alumnos que se presentaron, un 10,2% máis que en 2010. O 65,8% aprobou, o que supón 8,6 puntos máis que o ano anterior. Nesta proba, o 5% dos alumnos presentados fíxoo en universidades privadas. Nas universidades públicas o 65,4% superou estas probas, mentres que esta cifra foi do 73,9% nas privadas.
Excluídas tanto as probas para maiores de 25 anos como as probas para maiores de 45 anos, 193.341 alumnos (o 82,7%) presentáronse a ambas as fases, xeral e específica, e aprobaron o 91,6% deles. En xuño 159.071 estudantes presentáronse ás fases xeral e específica, dos que aprobou o 94,4%. Na convocatoria extraordinaria de setembro esa porcentaxe baixou ao 78,7%. En cambio, 17.610 alumnos (o 7,5%) preferiron presentarse só á fase xeral, dos que aprobou o 77,3%.
Un total de 22.741 alumnos examináronse exclusivamente dalgunha materia da fase específica (alumnos que desexan mellorar a cualificación obtida en convocatorias anteriores ou a cualificación obtida nos módulos dos Ciclos Formativos de Grao Superior). Deles o 76,9% fíxoo na convocatoria de xuño. O 71,6% destes estudantes superou a proba nalgunha das materias ás que se presentou. Esta porcentaxe foi maior na convocatoria extraordinaria de setembro (74,1%) que na de xuño (70,1%).
