O achado na provincia chinesa de Liaoning (norte) dos restos dun mamífero parecido a un can que viviu fai 130 millóns de anos, puxo en dúbida que os dinosauros dominasen a Terra, segundo publica a revista “Nature”.
Ata agora críase que os mamíferos primitivos asemellábanse a ratos que se escurrían entre as patas dos dinosauros para non ser devorados. Con todo, o “Repenomamos giganticus” medía máis dun metro de longo e tiña un aspecto similar ao demo de Tasmania, un marsupial que vive actualmente nesa illa australiana. A súa considerable talla fai pensar aos seus descubridores, do Museo Norteamericano de Historia Natural de Nova York, que este mamífero podía enfrontarse a saurios pequenos para conseguir comida ou dominar territorios.
A dieta do “Repenomamos giganticus” consistía probablemente en plantas e carne, polo que non se descarta que incluíse a pequenos dinosauros. Os científicos xa acharon anteriormente restos dunha cría de dinosauro no estómago dun parente de talla menor do “giganticus”, un “Repenomamos robustus”, cuxo esqueleto se atopou na mesma provincia chinesa.
Este novo descubrimento “permite esbozar unha imaxe totalmente diferente de moitos animais que coexistiron cos dinosauros”, sinala o doutor Meng Jin, un dos responsables do achado. A teoría máis estendida ata o momento apuntaba que os mamíferos coetáneos aos dinosauros eran pequenos, comían principalmente insectos e cazaban de noite para evitar atoparse cos dominadores da Terra. Nese sentido, creuse que non foi ata a extinción deses animais xigantescos, fai 65 millóns de anos, que apareceron os primeiros mamíferos de tallas máis significativas.
