A Universidade de Granada (UGR) é a primeira de España na área de Ciencias da Computación e atópase no número 19 das 300 mellores de todo o mundo, segundo a última edición do coñecido como Ranking de Taiwan (Clasificación do desempeño das Publicacións Científicas para as universidades do mundo), realizado polo Consello de Avaliación do Ensino Superior e Acreditación de Taiwan. No ranking tamén aparecen a Universidade Politécnica de Cataluña (posición 61) e a Politécnica de Valencia (posto 78).
Á cabeza da clasificación sitúase o Massachusetts Institute of Technology, seguida da University of California-Berkeley, Stanford University, Nanyang Technological University, Tsinghua University, Harvard University, City University of Hong Kong, Carnegie Mellon University, National University of Singapore e University of Illinois-Urbana Champaign.
O Ranking de Taiwan mide a cantidade e a calidade da investigación en universidades de todo o mundo. Para iso, emprega como fonte de información as bases de datos de Thomson Reuters Web of Science e Essential Science Indicators, onde se recollen as mellores revistas científicas mundiais, explica a UGR.
Para calcular o ranking, os autores empregan oito indicadores diferentes clasificados en tres apartados con diferente peso: Produtividade (20%), Impacto (30%) e Excelencia (50%). Algúns dos indicadores empregados son o número de artigos ISI, número de citas nos últimos 11 anos e últimos dous anos, o Índice H dos últimos dous anos ou o número de artigos altamente citados do últimos dez anos.
