O 60% dos alumnos non sabe que estudar a tres meses da Selectividade, segundo o último informe acerca da opinión dos preuniversitarios sobre a Universidade, publicado pola Fundación IUVE que, ante esta problemática, celebrará do 21 ao 24 de febreiro, na Cidade Universitaria de Madrid, unhas xornadas de orientación profesional denominadas “Acerta 2006”.
Nelas tentarase orientar a uns 6.000 mozos que están preto de terminar o Bacharelato na elección dos seus próximos estudos. Os alumnos poderán obter información das distintas áreas do saber nos case 20 pavillóns dispostos para mostrar a máis ampla oferta educativa tanto en carreiras universitarias como en Formación Profesional (FP).
Cada estudante, ademais, completará unha ficha cos seus datos persoais que se introducirá en distintas urnas, segundo as súas preferencias de estudo, para recibir posteriormente nos seus respectivos domicilios a información pertinente das universidades e centros de formación.
Tamén está prevista a posta en marcha de dous tipos de tutorías, impartidas por estudantes de últimos anos de carreira e FP. Na primeira, os mozos que se atopen máis desorientados poderán expor, a través de charlas e xogos, as súas inquietudes e capacidades profesionais. O segundo tipo de tutoría dirixirase aos alumnos que se debatan entre dous ou tres carreiras; os titores axudaranos a decidirse pola máis adecuada ao seu perfil a través dunha charla persoal.
