O cerebro humano pode usar dous mecanismos distintos para medir o paso do tempo, asegura o científico español Javier Medina á revista “Neuron”, tras traballar con monos e descubrir que estes miden o paso dos milisegundos de forma intuitiva, pero tamén segundo a velocidade e o espazo percorrido por un obxecto de interese.
Medina explica que o traballo do equipo de científicos cos que traballou consistiu en demostrar que, aínda que o cerebro é capaz de medir o tempo a base de ir contando como pasan os milisegundos, algo que recibe o nome de cronometro “neuronal”, ese non é sempre o caso.
Este traballo confirma precisamente que os milisegundos tamén son contados polo cerebro en función da velocidade e o espazo percorrido por un obxecto de interese, insiste este científico, que traballa no Howard Hughes Medical Institute, na Universidade de California. Ao parecer, o cerebro elixiría un ou outro sistema dependendo de cal lle resultase máis útil, con maior precisión temporal.
No experimento, un grupo de monos contemplaba nunha televisión un puntiño de luz, que empezaba a moverse cara á dereita, e que, tras transcorrer un certo tempo (por exemplo 500 milisegundos), cambiaba de dirección para ir cara arriba.
Ao repetirse esa traxectoria unha e outra vez, os monos eran capaces de predicir o momento exacto no que o puntiño de luz cambiaba de dirección; por iso, segundo Medina, o cerebro dos monos ten que poder medir o paso do tempo con moitísima precisión.
