As consecuencias da explosión do reactor número catro da planta ucraína de Chernobil non foron tan graves como se esperaba. Esta é a conclusión dun estudo da ONU e dos gobernos de Rusia, Ucraína e Bielorrusia presentado onte en Viena.
O informe “Chernobil: a verdadeira escala do accidente” establece en 56 o número de mortos debido á reacción liberada aquel 26 de abril de 1986. Deles, 47 eran operarios da primeira quenda de equipos de emerxencia que recibiron fortes doses de radioactividade. O resto de vítimas son nove nenos que faleceron de cancro de tiroides.
Pero esa cifra aínda pode elevarse máis. O total de mortes posibles por mor da explosión podería chegar ata 4.000, indica o informe. Este número de vítimas pode alcanzarse durante o tempo de vida das 600.000 persoas (traballadores, evacuados e residentes) que se consideran baixo risco de sufrir cancro ou leucemia. O documento, no que colaborou a Organización Mundial da Saúde (OMS), subliña que entre os 4.000 casos de cancro de tiroides detectados en nenos e adolescentes a porcentaxe de supervivencia foi do 99%.
A pesar de que estas cifras son arrepiantes, o informe insiste en que as consecuencias do desastre son menores do temido e aclara que os expertos non atoparon “impactos negativos profundos” no resto da poboación das áreas próximas. Igualmente, menciona que o impacto psicolóxico é hoxe día o maior problema de saúde desatado polo accidente: os habitantes das zonas afectadas han desenvolvido unha percepción negativa do seu benestar e sofren un esaxerado sentimento de ameaza contra a súa saúde e a crenza de que a súa vida será máis curta.
