Un informe da Organización das Nacións Unidas para a Agricultura e a Alimentación (FAO), publicado co título “A riqueza dos residuos: economía do uso das augas residuais na agricultura”, recomenda o uso de augas residuais urbanas na agricultura para mitigar a escaseza deste elemento e reducir custos.
Reciclar as augas residuais urbanas e usalas para os cultivos agrícolas “pode axudar a mitigar os problemas de escaseza de auga e reducir a contaminación nela”, afirma o traballo. O uso de augas residuais tratadas na agricultura “practícase en preto de medio centenar de países e ocupa unha superficie que ascende ao 10% do total de terras cultivadas a escala mundial”, afirma o organismo da Organización das Nacións Unidas (ONU).
Esta práctica atrae cada vez maior interese en todo o mundo, e nalgúns países como España e México, unha porcentaxe elevada de augas tratadas destínase á rega. No entanto, a escala global, “tan só unha pequena parte das augas residuais tratadas utilízanse para a agricultura”, apuntan desde a FAO. Os estudos de casos incluídos no informe indican que unha xestión segura das augas residuais na produción alimentaria supón “unha forma de aliviar a competencia entre as cidades e a agricultura pola auga en rexións onde a escaseza aumenta”, sinala o director Adxunto da División de Terra e Augas da FAO, Pasquale Steduto. “Nun contexto adecuado pode axudar tamén co tratamento das augas residuais e a consecuente contaminación dos ríos”, engade.
Steduto mantén que se constatou que os campesiños tamén poderían aforrarse parte do custo de bombear augas subterráneas, á vez que os nutrientes presentes nas augas residuais reducen o gasto en fertilizantes. “Tratada de forma adecuada e reciclada en forma segura, a auga pode ofrecer potencialmente un triplo dividendo aos usuarios urbanos, os campesiños e o medio ambiente”, conclúe.
