Membros da Cátedra Lledró-Universidade Europea de Madrid (UEM) afirman que a iluminación do Nadal que utilice as novas lámpadas de tecnoloxía Diodo Emisor de Luz (LED) contribúe a reducir o consumo eléctrico. Estas lámpadas tamén demostraron ser moito máis seguras, xa que non teñen risco de curtocircuíto coa auga nin queiman ao contacto coa pel, ademais de non emitir calor asociada á luz, engadiron.
“A seguridade que proporcionan é un aspecto que se debe ter moi en conta, sobre todo naqueles fogares onde hai nenos”, xa que, polas súas características, “fai que non dane por decoloración nin por risco de lume o mobiliario onde se instalan”, explicou o coordinador da cátedra, José Luís Candía. A estas vantaxes de seguridade, a directora da cátedra e do máster universitario en Edificación Eficiente e Rehabilitación Enerxética e Ambiental que se impartirá a partir de 2010 no Centro Superior de Edificación, Susana Moreno, engadiu as derivadas do aforro enerxético e consumo.
“Estímase que unha lámpada destas características consome un 50% menos que unha convencional, polo que en tres anos o consumidor recupera o investimento realizado”, apuntou Moreno. A vida media dunha LED é de 50.000 horas (con oito horas diarias poden durar ata 13 anos), polo que en opinión de Candía, aínda que haxa que investir “algo máis de diñeiro” en adquirilas, “a medio-curto prazo dan un retorno moi rápido do investimento”.
O pasado nadal emitíronse un total de 15.000 toneladas de CO2 á atmosfera, polo que Moreno indicou que “na actualidade existe unha necesidade e interese social pola procura da eficiencia enerxética e a sustentabilidade ambiental, na que o deseño debe estar unido”. Así mesmo, asegurou que “esta iluminación representa un papel moi importante tanto para a redución de consumos como nos beneficios que supón para a saúde, polo que o fogar non pode quedar fóra deste contexto”.
