A poboación mundial, que rolda na actualidade os 7.000 millóns, alcanzará 10.100 millóns de persoas para 2100. Esta é unha estimación realizada pola División de Poboación do Departamento de Asuntos Económicos e Sociais da Organización das Nacións Unidas (ONU). O crecemento da poboación virá motivado, sobre todo, por un total de 39 países cun alto índice de fertilidade, situados na súa maioría en África.
Espérase que a poboación global sexa duns 9.300 millóns de habitantes cara á metade deste século e de 10.100 ao comezo do seguinte, aínda que a marxe que manexa a ONU chegaría ata 15.800 millóns en 2100 se se ten en conta un índice de fertilidade máis alto, ou caería ata os 6.200 millóns se o índice é máis baixo, de acordo coa “Revisión 2010 das Perspectivas de Poboación Mundial”.
O 42% da poboación vive na actualidade en países cuxa taxa de fertilidade é baixa, é dicir, cuxas mulleres non teñen os suficientes fillos para garantir que polo menos unha filla sobreviviraa. Outro 40% vive en países cunha taxa de fertilidade intermedia, mentres que o 18% restante reside en países onde as mulleres teñen de media máis de 1,5 fillas. Estes últimos países concéntranse en África, con 39 dos 55 países do continente, Asia, con nove, Oceanía, con seis, e América Latina, con catro. En canto aos países coa taxa de fertilidade máis baixa, estes concéntranse en Europa -salvo Islandia e Irlanda-, 19 en Asia, 14 en América, dúas en África (Mauricio e Tunes) e Australia.
A poboación nos países cunha alta taxa de fertilidade pasará de 1.200 millóns a 4.200 millóns entre 2011 e 2100, mentres que no caso dos países cunha taxa media pasarase de 2.800 a 3.500 millóns (un 26% máis). No caso dos países cunha taxa de fertilidade baixa, a poboación diminuirá ao pasar de 2.900 millóns a 2.400 millóns.
O estudo da ONU apunta tamén que a esperanza de vida mellorará no tres grupos de países durante os próximos 90 anos. Actualmente, a esperanza de vida nos países con fertilidade baixa é duns 56 anos, en gran medida debido ao VIH/Sida, pero espérase que cos avances na loita contra esta enfermidade pase a ser de 69 anos para 2045-2050 e aos 77 anos para 2095-2100.
