Os ministros de Medio Ambiente da Unión Europea (UE) consideran necesaria a creación dun Observatorio Europeo da Seca, cuxa función sería “contribuír ao prognóstico das secas, á súa avaliación e seguimento, ademais de intercambiar boas prácticas sobre este asunto”.
Os Vinte e sete aprobaron unhas conclusións sobre escaseza de auga, seca e adaptación ao cambio climático, unha das prioridades da presidencia española en materia de medio ambiente, segundo lembrou a ministra española de Medio Ambiente, Elena Espinosa. Na súa opinión, estas conclusións recoñecen que “a escaseza de auga e as secas son xa serios problemas en moitas rexións europeas” e é posible que a situación se agrave debido á demanda crecente e á incidencia do cambio climático.
Espinosa explicou que a seca provoca xa efectos “moi negativos sobre a biodiversidade e a saúde humana”. “Cada vez son máis frecuentes os períodos de seca e de inundacións e a súa severidade, especialmente no sur de Europa”, insistiu a ministra.
As conclusións aprobadas animan aos Estados membros que corren o risco de sufrir situacións de escaseza de auga ou de seca de consideración, ou mesmo de desertización, a que elaboren os correspondentes plans de xestión da escaseza de auga e da seca. Tamén reclaman un uso máis eficiente e sustentable da auga na agricultura. Os ministros de Medio Ambiente piden tamén que se poidan usar as axudas do Fondo de Solidariedade para situacións de seca prolongada.
Os Vinte e sete aprobaron tamén unhas conclusións sobre como preparar os bosques ao impacto do cambio climático. Nelas reclámase reforzar a cooperación a escala da UE e internacional para lograr unha xestión sustentable dos bosques e mellorar a recollida de información. Na actualidade, cada ano arden na UE 500.000 hectáreas de bosque en ao redor de 50.000 incendios.
