A Consellería de Agricultura, Gandaría e Pesca da Generalitat de Cataluña alertou onte pola tarde da aparición dunha marea vermella na baía de Els Alfacs no Delta do Ebro. De momento, a primeira medida que se tomou foi a de paralizar a extracción de moluscos e prohibido a extracción libre xa que o seu consumo podería supor unha intoxicación alimentaria grave.
O programa permanente de vixilancia das mareas vermellas das Consellerías de Agricultura e de Sanidade de Cataluña detectou a presenza de niveis da biotoxina DSP -Toxina Diarreica de Moluscos Bivalvos- por encima dos niveis de seguridade en mostras de mexillón procedentes da devandita baía.
A extracción de moluscos permanecerá paralizada ata que as análises ofrezan garantías, sinalou o Departamento catalán de Agricultura, quen xa informou da prohibición ás asociacións de produtores e as confrarías de pescadores afectadas, así como ás autoridades portuarias e forzas de seguridade, as direccións xerais de Saúde Pública e de Portos, a Axencia Catalá da auga e os centros de expedición e depuración de moluscos de Cataluña.
As mareas vermellas son concentracións elevadas de fifoplancton dinoflagelado que poden producir biotoxinas como a DSP. Cando os moluscos filtran a auga para alimentarse acumulan estas biotoxinas no seu corpo e o seu consumo pode supor un perigo para a saúde.
Os mecanismos de vixilancia e control que se están levando a cabo aseguran a salubridade dos moluscos que se comercializan nos circuítos habituais, asegura a Consellería de Agricultura.
