O Ministerio de Industria deu a coñecer onte a multa imposta á central nuclear tarraconense de Ascó I pola fuga radioactiva ocorrida a finais de 2007. O departamento que dirixe Miguel Sebastián anunciou que a planta deberá pagar 15,4 millóns de euros. Aínda que a cifra está lonxe dos 22,5 millóns propostos orixinalmente, trátase da sanción económica máis alta imposta ata a data a unha central nuclear española. Ata agora, a marca ostentábao Vandellós II, tamén en Tarragona, con 1,6 millóns de euros. A penalización máxima prevista pola lei para incidentes nucleares é de 30 millóns.
Os ecoloxistas consideran “insuficiente” a multa
Nun comunicado, Industria desagregou os diferentes conceptos da sanción. O máis cuantioso, 7,5 millóns de euros, débese á “emisión radioactiva con potencial de superación do límite anual de dose para membros do público no interior do dobre valado da central”, cualificada como infracción grave “en grao máximo”. Penalízase ademais con senllos importes de tres millóns de euros o non establecer un control de contaminación externa unha vez descuberta a do interior do emprazamento, e non facilitar á inspección residente “información pronta e veraz”. Xunto a estas, hai outro tres sanciones, unha grave en grao medio e dous leves.
Para Carlos Bravo, responsable da campaña antinuclear de Greenpeace , trátase dunha multa “ridícula, comparada co beneficio económico obtido pola central durante os meses que estivo en funcionamento antes de comunicar a fuga”, e que “non disuade á empresa nin obriga a cambiar a súa cultura de seguridade nin a súa política de ocultación de datos”.
Bravo critica ademais que o Consello de Seguridade Nuclear (CSN) non comunicase nunca, “aínda que o sabe”, a cantidade total de radioactividade emitida, “moito maior do que se dixo oficialmente”.
Igualmente, Ecoloxistas en Acción considera a multa “insuficiente”. Segundo o portavoz da agrupación, Javier González, “15 millóns de euros é o que factura Ascó en só 15 días”.
Rexistráronse “fallos significativos no control e a subministración de información” por parte do titular da planta
Pola súa banda, o xerente da Asociación de Municipios Afectados por Centrais Nucleares (AMAC), Mariano Vila’D Abadal, esixiu ao titular da central que “acate a sanción e pague” a contía imposta.
Risco remoto
En agosto, o CSN propuxo multar a Ascó I con 22,5 millóns de euros porque, “aínda que non existiu dano á poboación nin ao medio ambiente” e a estimación do risco era “remota”, rexistráronse “fallos significativos no control e a subministración de información” por parte do titular da planta, Endesa.
O incidente comunicouse ao Consello en abril de 2008, con cinco meses de demora. En novembro de 2007, unha cantidade de auga e lodos contaminados acabaron indebidamente na piscina do combustible gastado, unha das zonas de maior intensidade radioactiva da central, e despois no sistema de ventilación, que as dispersou por boa parte do perímetro da planta.
O caso da fuga radioactiva provocou as destitucións do director da central, Rafael Gasca, e do xefe de protección radiológica, F. G. T., por ocultar información.
Durante os meses seguintes ao escape, os servizos sanitarios do Goberno central practicaron máis de 2.000 avaliacións médicas a traballadores e persoas vinculadas á central, incluídos decenas de escolares que visitaran as instalacións despois do 28 de novembro, día que se produciu a fuga.
Precisamente, 44 alumnos do Colexio Maristas de Xirona visitaron a central nuclear, acompañados de tres profesores, o 4 de abril, o mesmo día que se coñeceu o escape de partículas radioactivas.
