A especie botánica Riella notarisii, que se cría extinguida na provincia de Valencia, volveu a reaparecer, segundo informou onte a Generalitat Valenciana. Este achado, enmarcado no proxecto LIFE Natureza Projecte Ullals que leva a cabo a Conselleria de Territorio e Vivenda para recuperar a contorna do Parque de L’Albufera, tivo lugar no Ullal de Baldoví.
“O máis destacable deste achado é a forma na que reapareceu a especie, nin máis nin menos como consecuencia dos labores de recuperación dalgúns antigos ullals que foran colmatados na antigüidade”, explicou o conseller de Territorio e Vivenda, Esteban González Pons. Algunhas esporas desta hepática quedaron enterradas e permaneceron en estado latente. “Ao atoparse coas condicións favorables de humidade e salinidade, estas esporas germinaron dando lugar a novas plantas”, detallou González Pons.
Os cambios de drenaxe e o aumento da mecanización dos cultivos agrícolas provocaron a extinción desta especie na provincia de Valencia. A especie achada pertence á clase hepaticae, trátase da Riella notarisii, cuxo aspecto lembra “ao dunha alga”, sinalou o conseller, que anunciou que se porá en marcha un plan de recuperación e mantemento desta nova poboación de Riella.
O proxecto LIFE-Natureza, en cuxo marco se produciu este achado, conta cun investimento de 1.061.972 euros ata o ano 2008, cunha porcentaxe de participación da Unión Europea do 75%. As actuacións levadas a cabo deron lugar á recreación ambiental en seis hectáreas da contorna inmediata do ullal de Baldoví. Esta rexeneración ambiental “esta favorecendo a recuperación espontánea da cuberta vexetal nas beiras e lagoas, o que permitiu a recuperación da Riella notarisii, aseguraron desde a Conselleria.
