España non será indemnizada, de momento, polo desastre orixinado polo “Prestige” en 2002. Un xuíz de Nova York desestimou a demanda que interpuxo o noso país contra a empresa estadounidense American Bureau of Shipping (ABS), que certificou que o petroleiro era apto para transportar combustible.
A denuncia foi presentada no Tribunal Federal de Manhattan en maio de 2003. España pedía a ABS e a outras empresas afiliadas compensacións por considerar que actuaran de forma neglixente ao clasificar como apto ao buque que se afundiu fronte ás costas de Galicia.
Pola súa banda, a empresa estadounidense solicitou que non se tivese en conta esta demanda porque non se probou a súa culpabilidade respecto á vertedura. Ademais, argumentaba que a Convención Internacional de Responsabilidade Civil para Danos por Contaminación de Petróleo (CLC), asinada por España, impide que un país reclame compensacións nese sentido en países non asinantes da mesma, como é o caso de Estados Unidos.
Tras estudar as alegacións de ambas as partes, o xuíz aceptou a moción da parte demandada tendo en conta que as reclamacións de España ante ese Tribunal Federal non están permitidas pola CLC.
Neste tipo de incidentes, a citada convención impón estritas pero limitadas responsabilidades ao propietario do petroleiro e exclúe das mesmas a terceiros, con excepción de se concorren determinadas circunstancias.
O xuíz lembra que a CLC require que quen resulte afectado por unha vertedura de combustible debe buscar compensacións nos seus tribunais ou nos doutros países implicados, e que subscribisen dita convención, algo que non fixo Estados Unidos. Por iso, conclúe que “o tribunal carece da xurisdición necesaria” para atender as reclamacións españolas.
