Greenpeace pide á UE que obrigue ás eléctricas a comunicar as fontes de enerxía que utilizan

• Autor: Por mediatrader
• Data de publicación: Domingo, 28deAbrilde2002

Greenpeace pediu onte aos ministros de Enerxía da Unión Europea (UE), reunidos en Pamplona, que as compañías eléctricas estean obrigadas a informar de todas as fontes de enerxía que utilizan, medida “esencial” para que os consumidores poidan exercer o seu dereito de decidir a quen compran nun mercado liberalizado.

“A información das empresas debe figurar na factura e nos anuncios”, afirmou José Luís García Ortega, responsable da campaña de enerxía e cambio climático da organización.

En opinión de Ortega, debe proporcionarse aos consumidores a desagregación das fontes de enerxía das empresas que compiten neste sector, así como os impactos ambientais asociados.

Os ecoloxistas tamén propuxeron á Unión Europea que as fontes de enerxía renovable teñan acceso prioritario á rede eléctrica e que se asegure que todas as compañías realizan programas de xestión da demanda, para incentivar o aforro e o uso eficiente da enerxía por parte dos seus clientes.

Outras medidas que defende Greenpeace son que quen consuma electricidade de “fontes sucias” pague máis que quen o faga de “fontes limpas”, que se asegure que os fondos destinados ao desmantelamento nuclear só se usen para ese fin e que non se permita a importación de electricidade que non cumpra os mínimos niveis que se esixen dentro da UE.