Máis de 250.000 británicos participaron onte nos dous centenares de cazarías organizadas en todo o país para celebrar o Boxing Day, día festivo no Reino Unido e tradicionalmente dedicado á caza do raposo. Iso si, estiveron vixiados de preto pola Policía e por grupos de defensa dos animais, que denuncian que estas prácticas quebrantan a lei.
A lexislación que, desde febreiro de 2005, regula a caza do raposo en Inglaterra e Gales prohibe o uso de cans nas capturas, pero si permite que estes sexan utilizados para seguir o rastro das pezas, que poden ser atacadas por aves de rapina e abatidas a tiros. Segundo Mike Hobday, portavoz da liga Contra os Deportes Crueis, os cazadores cumpriron coa normativa durante os primeiros meses de vixencia, pero “as cousas empeoraron progresivamente” e agora a lei vulnérase de maneira “significativa”. Por iso, ademais de vixiar as cazarías con cámaras de vídeo, a liga demandará aos cazadores que non cumpran a norma.
Pola súa banda, os grupos que defenden o polémico deporte mostraron a súa indignación ante as accións dos ecoloxistas. Simon Hart, da Alianza do Campo, sinala que as actividades da liga Contra os Deportes Crueis son “inaceptables”. “Corresponde á Policía facer cumprir a lei neste país, non a un grupo de presión con motivos políticos”.
A polémica ao redor da caza do raposo non acaba aquí. Segundo anunciou onte o xornal “The”Times , a nova Lei de Protección Animal que se aprobará en abril podería incluír a prohibición do uso das aves de rapina nas batidas. Organizacións en defensa dos animais denunciaron as pésimas condicións en que as aves son transportadas para as cazarías.
