A inspección desenvolvida polo Consello de Seguridade Nuclear (CSN) elevou o suceso ocorrido en Ascó o pasado 28 de abril a nivel 1 na Escala Internacional de Sucesos Nucleares (Ines). O incidente, clasificado de forma inicial como de nivel 0, foi causado por un erro humano nunha válvula que controla a refrixeración do reactor e provocou unha fuga de 25.000 litros de auga polo interior da central.
O informe sinala que a resposta do persoal da quenda de operación “non foi suficientemente rigorosa”. A auga fluíu durante 13 minutos desde a zona de refrixeración do núcleo ata os sumidoiros da central, que sobordaron e alagaron a planta baixa do recinto de contención. A fuga alcanzou un nivel de 5 centímetros e mollou os pés de 19 empregados e diverso material de traballo, aínda que as probas radiológicas practicadas non detectaron contaminación nin nas persoas nin un impacto radiológico destacado no recinto.
O reactor atopábase en estado de parada programada por recarga de combustible e o escape non comprometeu o sistema de refrixeración en ningún momento, tal e como sinala o informe. Grazas a esta parada, a concentración de material reactivo da auga era mil veces inferior á que se rexistra cun funcionamento normal porque o refrigerante sométese a procesos de limpeza. Con todo, a fuga fixo necesaria a práctica de labores de descontaminación das áreas afectadas pola vertedura.
