O MARM dará a coñecer as innovacións tecnolóxicas no sector da pesca a través dunha nova publicación

• Autor: Por mediatrader
• Data de publicación: Martes, 14deXullode2009

O Ministerio de Medio Ambiente e Medio Rural e Mariño (MARM) anunciou a posta en marcha dun Boletín de Vixilancia Tecnolóxica da Pesca, co obxectivo de dar a coñecer as innovacións tecnolóxicas e mellorar a competitividade do sector pesqueiro español.

O boletín terá unha periodicidade semestral, e difundirase a través das webs de Pescaplus, a Plataforma Tecnolóxica da pesca e da acuicultura e da Fundación OPTI. Así mesmo, a Secretaría Xeral do Mar pretende dispor, a medio prazo, a través desta iniciativa, de boletíns de prospectiva e vixilancia tecnolóxica para todos os subsectores do sector pesqueiro.

No seu primeiro número, o boletín realiza un repaso dunha relación das patentes incorporadas recentemente a nivel mundial, e que son consideradas como potencialmente relevantes para o sector, ademais dunha selección de noticias sobre innovacións e avances no coñecemento e aplicación no sector pesqueiro.

A realización deste sistema foi encomendada á Fundación OPTI, que conta no proxecto coa colaboración dos centros tecnolóxicos AINIA e CETMAR, así como coa Oficina Española de Patentes e Marcas e a axencia Clarke, Modet &Co.

O sistema permite a exploración periódica e sistemática dos bancos de datos de patentes e doutras fontes de información, como revistas técnicas e comunicacións científicas, así como a selección das noticias máis útiles para o sector que se ofrecen a través destes boletíns técnicos.